راولپنڈی کی انسداد دہشتگردی عدالت میں 9 مئی جی ایچ کیو حملہ کیس کی سماعت ہوئی، مقدمہ میں نامزد پی ٹی آئی رہنما آج بھی عدالت پیش نہ ہوئےجس پر عدالت نے برہمی کا اظہار کیا۔
اے ٹی سی راولپنڈی نے 9 مئی جی ایچ کیو حملہ کیس میں نامزد پی ٹی آئی کے 18 غیر حاضر ملزمان کو اشتہاری قرار دے دیا۔
انسداد دہشتگردی عدالت کی جانب سے اشتہاری قرار دیے گئے ملزمان میں سینیٹ میں سابق قائد حزب اختلاف شبلی فراز، سابق اپوزیشن لیڈر قومی اسمبلی عمر ایوب خان، کنول شوذب، شیخ راشد شفیق اور زرتاج گل شامل ہیں۔
اس کے علاوہ مہر جاوید، محمد احمد چٹھہ، رائے حسن نواز، بلال اعجاز، مرتضیٰ خان، اشرف سوہنا، چودھری آصف، شکیل نیازی، محمد انصر اقبال، حیدر محمود، شاہیر سکندر اور حمزہ لطیف کو بھی اشتہاری قرار دیا گیا ہے۔
یہ بھی پڑھیں: عمران خان کی بہن عظمی خان کو ملاقات کی اجازت مل گئی
عدالت نے مقدمہ میں نامزد تمام ملزمان کی غیرمنقولہ جائیداد ضبط کرنے کا بھی حکم دے دیا جب کہ ملزمان کے متعلقہ اضلاع کے ریونیو افسران کو بھی اس حوالے سے احکامات جاری کر دیے گئے ہیں۔
عدالت نے ریونیو افسران کو ملزمان کی جائیداد قرق کرنے کے احکامات دیتے ہوئے کہا کہ ملزمان مقررہ تاریخ کے اندر عدالت کے سامنے خود کو پیش نہیں کرتے تو ان کی جائیداد نیلام کر دی جائے، عدالت کی جانب سے ملزمان کے ضامنوں کو بھی نوٹسز جاری کردیے گئے۔
