ڈپٹی کمشنر کی جانب سے جاری کردہ نوٹیفکیشن میں واضح کیا گیا کہ ضلع بھر کے تمام اسکول اب صبح 9 بجے سے دوپہر 2 بجے تک کھلے رہیں گے، جبکہ جمعہ کے روز اسکول صبح 9 بجے سے دوپہر 12 بجے تک ہی چلیں گے۔

ذہن نشین رہے کہ یہ فیصلہ گزشتہ روز پیش آنے والے افسوسناک ٹریفک حادثے کے بعد کیا گیا، جب دھند کے باعث ایک اسکول وین ٹرک سے ٹکرا گئی تھی۔ المناک حادثے میں 2 بچے جاں بحق جبکہ 21 زخمی ہو گئے تھے، جن میں سے بعض کی حالت تشویشناک بتائی جا رہی ہے۔

اس افسوسناک حادثے کے بعد والدین میں شدید خوف و ہراس پایا جا رہا تھا، جس پر ضلعی انتظامیہ نے فوری ایکشن لیتے ہوئے تعلیمی اوقات کار تبدیل کر دیے۔

ڈپٹی کمشنر نے کہا کہ یہ اقدام طلبہ کی جان و مال کے تحفظ کو یقینی بنانے کیلئے عوامی مفاد میں اٹھایا گیا ہے۔

دوسری جانب بلوچستان کے سرد علاقوں میں بھی موسمِ سرما کی شدت کے باعث تعلیمی سرگرمیوں میں تبدیلی کا فیصلہ کیا گیا ہے۔

یہ بھی پڑھیں:دھابیجی سب اسٹیشن اور گرڈ اسٹیشن پر سالانہ مینٹی ننس کا شیڈول جاری

صوبائی محکمہ تعلیم کے مطابق 16 دسمبر سے ڈھائی ماہ کیلئے سرکاری اسکول بند رہیں گے۔ مزید برآں صوبہ بھر میں موسمِ سرما کی تعطیلات 23 دسمبر 2025 سے 11 جنوری 2026 تک جاری رہیں گی، جبکہ تمام تعلیمی ادارے 13 جنوری 2026 کو دوبارہ کھلیں گے اور اسی روز نئے تعلیمی سیشن کا باقاعدہ آغاز ہوگا۔

والدین نے ضلعی انتظامیہ کے فیصلے کو بروقت اور مناسب قرار دیتے ہوئے اسے بچوں کی حفاظت کیلئے ضروری قدم قرار دیا۔

شہریوں کا کہنا ہے کہ دھند کے موسم میں ٹریفک حادثات میں خطرناک اضافہ دیکھا گیا ہے، اس لیے احتیاطی اقدامات ناگزیر ہو چکے ہیں۔ مجموعی طور پر نئے اوقات کار سے نہ صرف طلبہ کی حفاظت میں بہتری آئے گی بلکہ سرد موسم میں تعلیمی عمل بھی زیادہ منظم انداز میں جاری رہ سکے گا۔