ترجمان پاکستان ریلویز کے مطابق کراچی سے راولپنڈی کا کرایہ 5 لاکھ روپے سے کم کر کے ایک لاکھ 72 ہزار روپے کر دیا گیا جبکہ کراچی سے لاہور کا کرایہ 4 لاکھ 20 ہزار روپے سے کم کر کے ڈیڑھ لاکھ روپے کر دیا گیا۔

اسی طرح لاہور سے راولپنڈی کا کرایہ ایک لاکھ 5 ہزار روپے سے کم کر کے 44 ہزار روپے مقرر کیا گیا ہے۔

ترجمان پاکستان ریلویز کے مطابق سیلون کی بکنگ ڈویژنل دفاتر سے بھی کی جا سکے گی ، ہیڈ کوارٹرز سے بکنگ کے لیے چیف کمرشل منیجر کے دفتر سے رابطہ کیا جا سکتا ہے۔

یاد رہے کہ رواں برس مئی میں حکومت کیجانب سے لگژری سیلونز کی عام مسافروں کیلئے دستیابی کا اعلان کیا گیا تھا۔

یہ بھی پڑھیں: ریلوے کا ٹرینوں کے اوقات کار سے متعلق نیا اعلان

ریلوے ترجمان کی جانب سے بتایا گیا تھا کہ وزیرِاعظم، وزیر ریلوے، چیئرمین ریلوے، ایگزیکٹو افسران اور انسپکٹر جنرل ریلوے کے زیرِ استعمال رہنے والے پانچ لگژری سیلونز اب عام مسافروں کو بھی دستیاب ہوں گے۔

واضح رہے کہ لگژری سیلونز میں اعلیٰ معیار کی نشستیں، بہتر آرام دہ ماحول، ائیر کنڈیشننگ، جدید سہولیات اور پرائیویسی کا خاص خیال رکھا گیا ہے، ان سیلونز کو بالخصوص سرکاری افسران اور وی وی آئی پی شخصیات کے لیے تیار کیا گیا تھا مگر اب عام شہری بھی انہیں استعمال کر سکیں گے۔

ریلوے حکام کے مطابق اس فیصلے کا مقصد نہ صرف عوام کو بہترین سفری سہولت فراہم کرنا ہے بلکہ ریلوے کے اضافی وسائل سے آمدن حاصل کرنا بھی ہے۔