سندھ میں گاڑیوں کی نمبر پلیٹس کی تبدیلی کا معاملہ پر سندھ ہائیکورٹ میں دائر درخواست میں سیکرٹری ایکسائز اینڈ ٹیکسیشن، موٹر وہیکل رجسٹریشن ونگ اور ڈی آئی جی ٹریفک کو فریق بنایا گیا ہے، وکیل درخواست گزار نے درخواست فوری سماعت کیلئے مقرر کرنے کی استدعا کردی۔

وکیل درخواست گزار نے مؤقف اپنایا کہ سماجی کارکن فیضان حسین کی درخواست جولائی سے التوا کا شکار ہے، نئی نمبر پلیٹس سے متعلق ڈیڈ لائن دسمبر میں ختم ہورہی ہے، عوامی مفاد کے معاملے کی فوری سماعت کی جائے۔

درخواست گزار کے وکیل کی استدعا پر عدالت نے درخواست 28 نومبر کو سماعت کے لیے مقرر کر دی۔

سندھ ہائیکورٹ میں دائر درخواست میں مؤقف اپنایا گیا کہ سندھ حکومت کے نمبر پلیٹس کی تبدیلی کے فیصلے سے غریب شہریوں کو مشکلات کا سامنا ہے، سندھ حکومت کے نوٹیفکیشن کے مطابق نئی نمبر پلیٹ نہ لگانے والے شہریوں کی گاڑیاں ضبط کرلی جائیں گی۔

یہ بھی پڑھیں: خبردار! موٹر سائیکل سواروں کیلئے نئی پابندی عائد

درخواست میں کہا گیا کہ شہریوں نے پرانی نمبر پلیٹس بھی رقم کی ادائیگی کے بعد حاصل کی تھیں، حکومت کو نئے ڈیزائن کی نمبر پلیٹس مفت فراہمی کرنی چاہئیں، پرانی نمبر پلیٹس بھی حکومت کی جاری کردہ ہی تھیں، نئی نمبر پلیٹس کی غیر موجودگی پر جرمانے اور ضبطگی کی کوئی وجوہات نہیں ہیں۔

درخواست گزار نے کہا کہ موٹر وہیکل اور ٹریفک پولیس نے نئی نمبر پلیٹس کی بنیاد پر کاروبار شروع کردیا ہے، نمبر پلیٹ کے حصول کے لیے بھاری رقم وصول کی جارہی ہے ، سرکاری ادارے نئی نمبر پلیٹس کیلئے مہینوں انتظار کروا رہے ہیں جبکہ سڑک کنارے بیٹھے لوگ جعلی نمبر پلیٹس بنارہے ہیں ، ٹریفک پولیس کی جانب سے شہریوں کو غیر ضروری طور پر حراساں کیا جارہا ہے۔

عدالت عالیہ میں دائر درخواست میں استدعا کی گئی کہ شہریوں کو مفت نئی نمبر پلیٹس جاری کرنے کا حکم دیا جائے ، شہریوں پر جرمانے اور گاڑیوں کی ضبطگی بند کی جائے۔