آسٹریلین ہائی کمیشن کے مطابق آسٹریلین امیگریشن ایپ اِمی کو اب پاکستان میں بھی متعارف کرا دیا گیا ہے جس کے باعث پاکستانی شہریوں کے لیے آسٹریلیا کا ویزا لینےکا طریقہ اب پہلے سے بہت سہل ہوگیا ہے۔
آسٹریلوی ہائی کمیشن کے مطابق اس ایپ کے ذریعے پاکستان کے لوگوں کے بہت سے وقت اور پیسے دونوں کی بچت ہوگی۔
ہائی کمیشن کی جانب سے بتایا گیا کہ اگر کوئی شہری پہلے کبھی اپنی بائیومیٹرک آسٹریلین ادارے کو دے چکا ہو اور اس کے پاس درست پاسپورٹ ہو تو دوبارہ بائیومیٹرک سینٹر جانے کی ضرورت نہیں۔
یہ بھی پڑھیں: کینیڈا کا پاکستانیوں کے لیے مکمل فنڈڈ اسکالرشپ کا آغاز
آسٹریلوی ہائی کمشنر ٹموتھی کین نے کہا کہ اِمی ایپ کی وساطت سے پاکستانی شہری سیاحت، تعلیم یا ورک ویزا کے لیے باآسانی اپلائی کر سکتے ہیں۔
آسٹریلین ہائی کمشنر کے مطابق ایپ کے ذریعے درخواست گزار کو کسی اپوائنٹمنٹ کے بغیر اپنا پاسپورٹ اسکین کر نے کی سہولت میسر ہو گی اور اپنی تصویر بھی ایپ کے ذریعے فراہم کر سکے گا۔
ہائی کمشنر کے مطابق اس ایپ کو 34 ممالک میں استعمال کیا جارہا ہے، اس ایپ کو پوری دنیا میں آپریشنل کرنے کا منصوبہ 2026 کے شروع میں مکمل ہوجائےگا۔
