تمام 602 پولنگ اسٹیشنز کے غیر حتمی غیر سرکاری نتائج سامنے آنے کے بعد ن لیگ کے امیدوار بابر نواز خان بھاری اکثریت سے کامیاب قرار پائے۔

جاری کردہ نتائج کے مطابق بابر نواز خان نے ایک لاکھ 63 ہزار 996 ووٹ لے کر واضح برتری حاصل کی، جبکہ پاکستان تحریک انصاف (پی ٹی آئی) کی حمایت یافتہ آزاد امیدوار شہرناز عمر ایوب ایک لاکھ 20 ہزار 220 ووٹ کے ساتھ دوسرے نمبر پر رہیں۔

خیال رہے کہ شہرناز عمر ایوب سابق قائدِ حزب اختلاف عمر ایوب خان کی اہلیہ ہیں، جن کی نااہلی کے باعث یہ نشست خالی ہوئی تھی۔

این اے 18 میں مجموعی طور پر 9 امیدواروں کے درمیان مقابلہ ہوا، جن میں نمایاں امیدواروں میں ن لیگ کے بابر نواز، پاکستان تحریک انصاف (پی ٹی آئی) کی حمایت یافتہ شہرناز عمر ایوب اور پاکستان پیپلز پارٹی (پی پی پی) کی ارم فاطمہ شامل تھیں۔ اس کے علاوہ 6 آزاد امیدوار بھی انتخابی دوڑ میں شریک تھے۔

یہ بھی پڑھیں:ضمنی انتخابات : قومی و صوبائی حلقوں میں لیگی امیدواروں کی برتری

واضح رہے کہ حلقہ این اے 18 میں رجسٹرڈ ووٹرز کی تعداد 7 لاکھ 53 ہزار 944 ہے، جبکہ ووٹنگ کیلئے 602 پولنگ اسٹیشن قائم کیے گئے تھے۔

یاد رہے کہ یہ نشست اس وقت خالی ہوئی تھی جب سابق وفاقی وزیر اور پاکستان تحریک انصاف (پی ٹی آئی) رہنما عمر ایوب کو 9 مئی ہنگامہ آرائی کیس میں سزا ہونے کے بعد قومی اسمبلی کی رکنیت سے نااہل قرار دیا گیا تھا۔