الیکشن کمیشن اور مقامی انتظامیہ نے ضمنی الیکشن کا پرامن انعقاد یقینی بنانے کے لیے انتظامات مکمل کر لیے۔
ڈپٹی کمشنر لاہور سید موسی رضا نے لاہور کے حلقہ این اے 129 میں آر او آفس کا دورہ کیا اور ضمنی الیکشن سے متعلق انتظامات کا جائزہ لیا۔
اس موقع پر گفتگو کرتے ہوئے ڈی سی لاہور سید موسیٰ رضا نے کہا کہ ضلعی انتظامیہ الیکشن کے حوالے سے اپنی ذمہ داری بخوبی سر انجام دے گی ، این اے 129 میں الیکشن کمیشن کے ضابطہ اخلاق پر عملدرآمد یقینی بنایا جا رہا ہے۔
ان کا کہنا تھا کہ امن و امان کے لیے قانون نافذ کرنے والے اداروں نے ڈیوٹیز لگا دی ہیں ، سکیورٹی انتظامات کے ساتھ انتخابی سامان کی محفوظ ترسیل یقینی بنائی جا رہی ہے، مانیٹرنگ ٹیمیں انتخابی مہم کے خاتمے کے بعد خلاف ورزیوں پر کڑی نظر رکھ رہی ہیں۔
ڈی سی لاہور کا مزید کہنا تھا کہ پولنگ کا عمل کل صبح 8 بجے سے شام 5 بجے تک بلا تعطل جاری رہے گا، ضلعی انتظامیہ الیکشن کمیشن کے اشتراک سے تمام لاجسٹک اور ٹرانسپورٹ فراہم کر رہی ہے، میڈیا ادارے الیکشن کمیشن کے کوڈ آف کنڈکٹ کے تحت امیدواروں کا تشہیری مواد نشر کرنے سے گریز کریں۔
یہ بھی پڑھیں: حلقہ این اے 129 ضمنی الیکشن کی پولنگ سکیم سامنے آگئی
دوسری جانب قومی و صوبائی حلقوں میں ضمنی انتخابات کے پرامن انعقاد کیلئے پنجاب پولیس نے سکیورٹی انتظامات مکمل کر لیے۔
ترجمان پنجاب پولیس نے بتایا ہے کہ پنجاب کے 13 قومی و صوبائی حلقوں میں سکیورٹی پر 20 ہزار سے زائد پولیس افسران و اہلکار تعینات کیے گئے ہیں۔
آئی جی پنجاب ڈاکٹر عثمان انور نے کہا کہ ووٹرز کو حق رائے دہی کے لئے پُرامن اور محفوظ ماحول فراہم کریں گے، الیکشن کمیشن کے ضابطہ اخلاق، دفعہ 144 اور اسلحہ پابندی کی خلاف ورزی پر زیرو ٹالرنس ہے، الیکشن میٹریل کی محفوظ ترسیل کے لئے فول پروف انتظامات کئے گئے ہیں۔
انہوں نے کہا کہ کُل 939 مرد ، 889 خواتین ، 964 مشترکہ پولنگ سٹیشنز پر ووٹرز اور عملے کو بھرپور سکیورٹی فراہم کر رہے ہیں، پنجاب کے مختلف انتخابی حلقوں میں قائم 2 ہزار 792 پولنگ سٹیشنز میں سے 408 انتہائی حساس اور ایک ہزار 32 حساس قرار دیے گئے ہیں۔
آئی جی پنجاب کا مزید کہنا تھا کہ انتہائی حساس پولنگ اسٹیشنز پر سی سی ٹی وی کیمروں کی تنصیب مکمل کر لی گئی ہے جہاں لمحہ بہ لمحہ مانیٹرنگ کی جائے گی، سنٹرل پولیس آفس، سیف سٹیز اتھارٹی، اضلاع کے کنٹرول اینڈ مانیٹرنگ رومز سے پولنگ کے عمل کی مسلسل نگرانی کی جائے گی۔
