ریسکیو ذرائع کے مطابق چھت گرنے کا دلخراش واقعہ خیبرپختونخوا کے ضلع نوشہرہ کی تحصیل پبی کے علاقہ ڈاگ جدید میں پیش آیا جہاں گھر میں موجود 8 افراد ملبے تلے دب گئے۔

ذرائع کا بتانا ہے کہ افسوسناک واقعہ کے نتیجے میں گھر کے 5 افراد جاں بحق ہو گئے جبکہ 3 زخمی ہوئے،ریسکیو 1122 کی میڈیکل اور ڈیزاسٹر ٹیموں نے موقع پر پہنچ کر لاشوں اور زخمیوں کو ملبے سے نکال کر اسپتال منتقل کر دیا۔

ریسکیو اہلکاروں نے مسلسل 3 گھنٹے کے آپریشن کے بعد لاشوں اور زخمیوں کو چھت کے ملبے سے نکالا اور زخمیوں کو ابتدائی طبی امداد کے بعد ہسپتال منتقل کیا۔

ذرائع کا بتانا ہے کہ افسوسناک واقعہ میں جاں بحق افراد کی شناخت 36 سالہ رضوان، 9 سالہ ولیدہ ،6 سالہ آیان، 5 سالہ حفصہ اور 4 سالہ دعا کے ناموں سے ہوئی جبکہ زخمی افراد میں 22 سالہ رابعہ، 17 سالہ آمنہ اور 2 سالہ رایان شامل ہیں۔

واقعہ کی اطلاع ملتے ہی ڈائریکٹر آپریشنز ریسکیو خیبر پختونخوا ڈاکٹر میر عالم خان اور ڈسٹرکٹ ایمرجنسی آفیسر نوشہرہ ملک اشفاق حسین بھی موقع پر پہنچ گئے اور امدادی کارروائیوں کا جائزہ لیا۔