وزیراعلیٰ خیبرپختونخوا سہیل آفریدی کی بانی پی ٹی آئی عمران خان سے ملاقات تو نہ ہو سکی تاہم بانی سے مشاورت کے بغیر ہی صوبائی کابینہ میں توسیع کا فیصلہ کر لیا گیا۔

ذرائع کا بتانا ہے کہ خیبر پختونخوا کابینہ کی توسیع کے معاملہ پر نئے وزراء کے ناموں کے لیے مشاورت شروع کر دی گئی، وزیر اعلیٰ سہیل آفریدی کابینہ میں نئے نامون کی شمولیت کیلئے قریبی حلقوں اور پارٹی قیادت سے مشاورت کر رہے ہیں۔

ذرائع کے مطابق صوبائی کابینہ میں مزید 5 وزراء، 3 مشیروں اور 5 معاون خصوصی شامل کیے جانے کا امکان ہے ، نئے وزراء کو جنگلات ، تعمیرات و مواصلات ، اعلیٰ تعلیم ، زراعت ودیگر اہم محکموں کے قلمدان تفویض کیے جائیں گے۔

یہ بھی پڑھیں: خیبرپختونخوا میں نرسنگ ایمرجنسی کے نفاذ کا فیصلہ

پارٹی ذرائع کا بتانا ہے گزشتہ رات گئے وزیراعلیٰ سہیل آفریدی کی کابینہ توسیع سے متعلق اہم مشاورت ہوئی ہے جبکہ کابینہ میں شمولیت کیلئے ممبران اسمبلی اور پارٹی رہنماؤں کے بھی وزیر اعلیٰ سہیل آفریدی سے مسلسل رابطے ہو رہے ہیں۔

واضح رہے کہ خیبرپختونخوا کابینہ اس وقت 10 وزراء، 2 مشیروں اور ایک معاون خصوصی پر مشتمل ہے۔

یاد رہے کہ وزیراعلیٰ سہیل آفریدی نے 15 اکتوبر کو وزارت اعلیٰ کا منصب سنبھالاتھا اور اس کے بعد متعدد بار وہ بانی پی ٹی آئی عمران خان سے مشاورت کے سلسلے میں اڈیالہ جیل گئے تاہم انہیں بانی سے ملاقات کی اجازت نہ ملی جس کے بعد انہوں نے حکومتی معاملات چلانے کیلئے مختصر کابینہ تشکیل دی تھی۔