آئی ایس پی آر کے مطابق خوارج کی موجودگی کی اطلاع پر سکیورٹی فورسز نے ضلع باجوڑ میں انٹیلی جنس بیسڈ آپریشن کیا، آپریشن کے دوران خوارج کے سرغنہ سجاد عرف ابوذر سمیت 11 خوارج ہلاک ہو گئے۔

آئی ایس پی آر کی جانب سے جاری بیان میں بتایا گیا کہ دوسری کارروائی ضلع بنوں میں خفیہ اطلاعات پر کی گئی جس میں 12 خوارج جہنم واصل ہوئے۔

ترجمان پاک فوج نے کہا کہ ہندوستانی سپانسر شدہ خارجیوں کو ختم کرنے کے لیے کارروائیاں کی جا رہی ہیں، ہلاک دہشتگردوں میں خوارج کا اہم سرغنہ سجاد عرف ابوذر بھی شامل ہے۔

آئی ایس پی آر کی جانب سے بتایا گیا کہ اسی نوعیت کی ایک اور کارروائی بنوں میں کی گئی، سکیورٹی فورسز نے مؤثر حکمت عملی کے تحت 12 مزید خوارج کو ٹھکانے لگا دیا۔

پاک فوج کے ترجمان نے کہا کہ علاقے میں سینیٹائزیشن آپریشن جاری ہے تاکہ کسی بھی بھارتی سرپرستی یافتہ دہشتگرد کے باقی ماندہ عناصر کو بھی ختم کیا جا سکے، “عزمِ استحکام” کے تحت جاری ملک گیر انسدادِ دہشتگردی مہم پوری طاقت سے جاری ہے۔

یہ بھی پڑھیں: خیبرپختونخوا، سکیورٹی فورسز کی کارروائی، 15 دہشتگرد ہلاک

آئی ایس پی آر کے مطابق سکیورٹی فورسز اور قانون نافذ کرنے والے ادارے ملک سے بیرونی حمایت یافتہ دہشتگردی کے مکمل خاتمے کے لیے پرعزم ہیں۔

صدرِ مملکت آصف علی زرداری اور وزیراعظم محمد شہباز شریف نے خیبرپختونخوا کے علاقوں باجوڑ اور بنوں میں کامیاب کارروائیوں پر سکیورٹی فورسز کو خراجِ تحسین پیش کیا اور فتنہ الخوارج کے 23 دہشت گردوں کو ہلاک کرنے پر سکیورٹی فورسز کی پذیرائی کی۔

صدر آصف علی زرداری نے بھارتی پشت پناہی میں سرگرم فتنہ الخوارج کے 23 دہشت گردوں کے خاتمے کو سکیورٹی فورسز کی مؤثر حکمت عملی قرار دیا۔

آصف علی زرداری کا کہنا تھا کہ باجوڑ میں خوارج سرغنہ سمیت متعدد دہشت گردوں کا مارا جانا امن دشمن عناصر کیلئے واضح پیغام ہے، سکیورٹی فورسز کی بروقت کارروائیاں ملک میں امن کے قیام کیلئے ریاست کے عزم کی عکاس ہیں۔

صد ر مملکت کا مزید کہنا تھا کہ پاکستان کی سرزمین پر غیر ملکی پشت پناہی میں سرگرم دہشت گردی کی کوئی گنجائش نہیں۔

وزیر اعظم محمد شہباز شریف نے کہا کہ عزم استحکام کے ویژن کے تحت سکیورٹی فورسز دہشت گردی کے خلاف بڑی کامیابیاں حاصل کر رہی ہیں،پوری قوم دہشت گردی کے خلاف اس جنگ میں پاکستان کی افواج کے ساتھ کھڑی ہے،ملک سے ہر قسم کی دہشت گردی کے مکمل خاتمے کے لئے پر عزم ہیں۔