خاندانی ذرائع کے مطابق وہ گزشتہ کئی روز سے کراچی کے ایک نجی اسپتال میں زیرِ علاج تھے۔

آفتاب شعبان میرانی کا تعلق شکارپور سندھ سے تھا، وہ ایک تجربہ کار سیاستدان اور پیپلز پارٹی کے دیرینہ کارکنوں میں شمار ہوتے تھے۔

انہوں نے 25 فروری 1990 سے 6 اگست 1990 تک سندھ کے وزیراعلیٰ کے طور پر خدمات انجام دیں، جبکہ بعد ازاں وفاقی وزیر برائے دفاع کے عہدے پر بھی فائز رہے۔

اہلِ خانہ کے مطابق مرحوم کی نمازِ جنازہ رات دس بجے مسجد بیت الاسلام، ڈیفنس فیز فور کراچی میں ادا کی جائے گی، جس کے بعد ان کی تدفین گزری قبرستان میں کی جائے گی۔

صدرِ مملکت آصف علی زرداری نے آفتاب شعبان میرانی کے انتقال پر گہرے دکھ اور افسوس کا اظہار کرتے ہوئے کہا کہ مرحوم شہید ذوالفقار علی بھٹو اور شہید محترمہ بے نظیر بھٹو کے قریبی ساتھیوں میں شامل تھے۔ ان کا شمار پیپلز پارٹی کے مخلص، وفادار اور تجربہ کار رہنماؤں میں ہوتا تھا جنہوں نے جمہوریت، وفاقِ پاکستان اور عوامی خدمت کیلئے گرانقدر خدمات انجام دیں۔

صدر مملکت نے مرحوم کے اہلِ خانہ، دوستوں اور پارٹی کارکنوں سے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ آفتاب شعبان میرانی کو اپنی جوارِ رحمت میں اعلیٰ مقام عطا فرمائے اور لواحقین کو صبرِ جمیل عطا کرے۔