ڈسٹرکٹ اینڈ سیشن کورٹس اسلام آباد میں بانی پی ٹی آئی عمران خان کی 6 اور سابق خاتون اول بشریٰ بی بی کی ایک ضمانت قبل از گرفتاری کی درخواست پر سماعت ہوئی، ایڈیشنل ڈسٹرکٹ اینڈ سیشن جج محمد افضل مجوکہ نے درخواستوں پر سماعت کی۔

دوران سماعت بانی پی ٹی آئی عمران خان اور ان کی اہلیہ بشریٰ بی بی کی جانب سے شمسہ کیانی ایڈووکیٹ عدالت میں پیش ہوئیں۔

عدالت نے سابق وزیراعظم عمران خان اور سابق خاتون اول بشریٰ بی بی کی ضمانت قبل از گرفتاری میں توسیع کردی اور پولیس کو 28 اکتوبر تک متعلقہ مقدمات میں پیٹرن انچیف پی ٹی آئی اور بشریٰ بی بی کی گرفتاری سے روک دیا۔

یہ بھی پڑھیں: پی ٹی آئی کارکن صنم جاوید پشاور سے گرفتار

عدالت نے آئندہ سماعت پر بانی پی ٹی آئی عمران خان کو عدالت میں یا بذریعہ ویڈیو لنک پیش کرنے کی ہدایت کردی، جج افضل مجوکہ نے ریمارکس میں کہا کہ اڈیالہ جیل حکام کو شوکاز نوٹس بھی جاری کررہا ہوں۔

بعدازاں عدالت نے بانی پی ٹی آئی عمران خان کی 6 اور ان کی اہلیہ بشریٰ بی بی کی ضمانت کی ایک درخواست پر مزید سماعت 28 اکتوبر تک ملتوی کر دی۔

واضح رہے کہ بانی پی ٹی آئی کے خلاف 9 مئی، اقدام قتل، جعلی رسیدوں سمیت دیگر مقدمات درج ہیں۔