نجی ٹی وی کی رپورٹ کے مطابق خیبرپختونخوا کے صوبائی دارالحکومت پشاور سمیت شانگلہ، بٹگرام و دیگر اضلاع میں زلزلے کے جھٹکے محسوس کئے گئے ۔
رپورٹ میں بتایا گیا کہ زلزلے کے باعث شہریوں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں اور دکانوں سے کھلے مقامات پر نکل آئے ۔
زلزلہ پیما مرکز کے مطابق ریکٹر سکیل پر زلزلے کی شدت 3.0 ریکارڈ کی گئی جبکہ زلزلے کا مرکز بٹگرام تھا تاہم خوش قسمتی سے زلزلے کے باعث تاحال کسی قسم کے جانی نقصان کی اطلاعات موصول نہیں ہوئی۔
صوبائی ڈیزاسٹر مینجمنٹ اتھارٹی (پی ڈی ایم اے ) خیبرپختونخوا کی جانب سے بتایا گیا کہ زلزلے کے بعد صوبہ بھر کی ضلعی انتظامیہ کو الرٹ کردیا گیا ہے۔
یہ بھی پڑھیں: کوئٹہ میں زلزلے کے جھٹکے، شہریوں میں خوف و ہراس
پی ڈی ایم اے خیبرپختونخوا کی جانب سے شہریوں کو ہدایت کی گئی ہے کہ زلزلے کے وقت پرسکون رہیں، عمارت سے باہر کھلی جگہ کا رخ کریں اور کسی بھی ہنگامی صورتحال کے لیے ضروری احتیاطی تدابیر اپنائیں۔
ماہرین ارضیات کے مطابق اس خطے میں زلزلوں کی بڑی وجہ زمین کی پلیٹوں کی حرکت ہے کیونکہ یہاں ہمالیائی اور یوریشین پلیٹس آپس میں ٹکرا رہی ہیں، ان ٹکراؤ کے باعث زمین کے اندر دباؤ بڑھتا ہے اور اچانک انرجی خارج ہونے سے زلزلے آتے ہیں۔
یاد رہے کہ گزشتہ روز بلوچستان کے دارالحکومت کوئٹہ سمیت گردونواح میں بھی زلزلے کے جھٹکے محسوس کیے گئے تھے تاہم کسی قسم کے جانی نقصان کا سامنا نہیں کرنا پڑا۔
