وزیراعلیٰ مریم نواز کی زیرِ صدارت پنجاب کابینہ کا 29 واں اجلاس ہوا جس میں171 نکاتی ایجنڈے پر غور کیا گیا، دوران اجلاس صوبائی کابینہ نے سیلاب متاثرین کے لئے حتمی امدادی پیکیج کی منظوری دے دی، سیلاب متاثرین کو17 اکتوبر سے امدادی رقوم کے چیکس کی فراہمی شروع کی جائے گی۔
منصوبے کے تحت سیلاب کے دوران جاں بحق فرد کے لواحقین کو 10 لاکھ، مستقل معذوری پر 5 لاکھ اور معمولی معذوری پر 3 لاکھ روپے دیے جائیں گے، پکا گھرمکمل گرنے پر 10 لاکھ، جزوی طور پر گرنے پر3 لاکھ، کچا گھر مکمل گرنے پر 5 لاکھ اور جزوی طور پر گرنے پر ڈیڑھ لاکھ روپے تک امداد فراہم کی جائے گی۔
اسی طرح بڑے مویشی پر 5 لاکھ تک اور چھوٹے جانوروں کے مرنے پر 50 ہزار روپے دیے جائیں گے، سیلاب کے دوران 25فیصد فصل کے نقصان پر 20ہزار روپے فی ایکڑ دینے اور پنجاب کے 2 ہزار 855 مواضعات میں آبیانہ اور ایگریکلچر انکم ٹیکس معاف کرنے کا اصولی فیصلہ کر لیا گیا۔
کابینہ اجلاس میں فیصلہ کیا گیا کہ سب سیلاب متاثرین کو امداد ملے گی تاہم آئندہ دریا کی گزر گاہ میں تعمیرات کی اجازت نہیں ملے گی۔
وزیراعلیٰ مریم نواز نے سیلاب کے دوران خدمات سراانجام دینے والی پوری ٹیم کو شاباش دی اور سینئر صوبائی وزیر مریم اورنگزیب، عظمیٰ بخاری، خواجہ سلمان رفیق، عمران نذیر، کاظم پیرزادہ، رانا سکندرحیات اور صہیب بھرتھ کو خراج تحسین پیش کیا۔
سول ڈیفنس کے رضاروں کی تنخواہ میں اضافہ
اجلاس کے دوران وزیراعلیٰ مریم نواز نے شاندار خدمات پر سول ڈیفنس رضاکاروں کی تنخواہوں میں 15 ہزار روپے ماہانہ اضافے کا بھی اعلان کیا۔
کابینہ اجلاس میں پنجاب کے خلاف جھوٹ پھیلانے کے رجحان کی مذمت کی گئی جبکہ سیلاب کے دوران انسان ہی نہیں مویشیوں کی جانیں بچانے کی تحسین کی گئی اور پنجاب کی تاریخ کا سب سے بڑا سیلاب ہونے کے باوجود شرح اموات سب سے کم ہونے پر سراہا گیا۔
اس موقع پر گفتگو کرتے ہوئے وزیراعلیٰ پنجاب مریم نواز نے کہا کہ پنجاب میں ایسا تباہ کن سیلاب پہلے کبھی نہیں دیکھا گیا، نارووال اور مظفرگڑھ سمیت پورے کے پورے شہر سیلاب سے متاثر ہوئے،وزراء، ڈپٹی کمشنرز،پولیس، ریسکیو، پی ڈی ایم اے اور سول ڈیفنس سمیت سب نے ناقابل بیان محنت کی۔
یہ بھی پڑھیں: پنجاب میں رواں سال 1100 سے زائد ای- بسیں چلانے کا اعلان
مریم نواز کا کہنا تھا کہ کابینہ میں نوجوانوں کوموقع دینے کے فیصلے کی درستگی کاپھر احساس ہوا، کابینہ اور وزراء دفتروں میں بیٹھنے کے لئے نہیں عوام کے دکھ میں شریک ہونے کے لئے ہیں، سیلاب کے دوران ساڑھے 11لاکھ متاثرین کا علاج بہت بڑاریکارڈ ہے۔
انہوں نے کہا کہ ہم سب پاکستانی ہیں چاروں صوبے برابر اور محترم ہیں، کسی صوبے پر مشکل آئے پنجاب سب کے ساتھ کھڑا ہوتا ہے، جس طرح دوسروں صوبوں کے لئے ہم دل اور وسائل کے دروازے کھلے رکھتے ہیں اسی طرح دوسروں سے توقع رکھتے ہیں ۔
سولر پاور کے بجلی نرخ میں کمی
اجلاس کے دوران وزیراعلیٰ مریم نواز نے ایل ڈی اے کو بیوٹی پارلرز وغیر ہ پر ٹیکس لگانے سے روک دیا جبکہ ممبربورڈکی نامزدگی کے لئے خصوصی ریسرچ کمیٹی بنانے کا حکم دیا، وزیراعلیٰ نے پنجاب کے سولر پاور کے بجلی نرخ میں دو روپے فی یونٹ کمی کر دی جبکہ رینٹ اے کار سروس پر ٹیکس کم کر کے 15فیصد کرنے کا حکم دے دیا۔
وزیراعلیٰ پنجاب نے اوورسیز پاکستانیوں کے لئے ایم بی بی ایس فیس 10ہزار ڈالر مقرر کردی جبکہ 20 ہزار ڈالر فیس کی تجویز مسترد کر دی، اجلاس کے دوران دیگر صوبوں کے ایم بی بی ایس امیدواروں کے لئے ایم ڈی کیٹ ٹیسٹ پاس کرنا لازمی قرار دیا گیا۔
اجلاس میں وزیراعلیٰ مریم نواز نے سموگ کی آمد سے قبل انتظامات مکمل کرنے ،پنجاب میں ہیلتھ اور ایجوکیشن کا کوئی ایجنڈا نہ روکنے اور صوبہ بھر میں ڈپٹی کمشنرز کو فلٹریشن پلانٹ آپریشنل رکھنے کی ہدایت کی ، وزیراعلیٰ نے غیرسرکاری اداروں کے زیر انتظام فلٹریشن پلانٹس کی مرمت اور بحالی کی ا جازت بھی دے دی۔
وزیر اعلیٰ مریم نواز شریف کی زیر صدارت پنجاب کابینہ کا 29 واں اجلاس 171 ایجنڈا نکات کاریکارڈ۔۔۔ pic.twitter.com/uGAwC0vyYB
— Government of Punjab (@GovtofPunjabPK) October 6, 2025
مریم نواز شریف نے وزیراعلیٰ آفس میں سپورٹ سٹاف کی بھرتی کا ایجنڈا مسترد کر دیا جبکہ لاہور میں مریم نواز راشن کارڈ پائلٹ پراجیکٹ کے اجرا اور انٹرسٹ فری الیکٹرک ٹیکسی کے منصوبے کی منظوری دی۔
ٹیچنگ انٹرنز کی بھرتی کی منظوری
دوران اجلاس پنجاب بھر میں 8 ہزار 84 کالج ٹیچنگ انٹرنز اور سکول ٹیچنگ انٹرنز کی بھرتی کی منظوری دے دی گئی، انرجی ڈیپارٹمنٹ کے ریکنسلی ایشن سیل کے 14 پراجیکٹ بیسڈ ملازمین کے معاہدے کی مدت میں توسیع اور پنجاب ایگریکلچر، فوڈ اینڈ ڈرگ اتھارٹی میں 25 آسامیوں پر بھرتی کے لیے پابندی میں نرمی کی منظوری دے دی گئی۔
پنجاب کابینہ نے کاؤنٹر ٹیررازم ڈیپارٹمنٹ پنجاب کے ریجنل ڈائریکٹر کی بھرتی کے لیے پابندی میں نرمی اور ماحولیاتی قوانین کے نفاذ اور فصلوں کی باقیات جلانے کی روک تھام کے لیے پنجاب کے 10 حساس اضلاع میں 444آسامیوں ، پنجاب ٹرانسپورٹ کمپنی میں 77 آسامیوں پر بھرتیوں پر عائد پابندی میں نرمی کی منظوری دے دی۔
دوران اجلاس پنجاب میں 379 اضافی ڈسٹرکٹ اینڈ سیشن ججز اور 872 سول ججز کم جوڈیشل مجسٹریٹس کی نئی آسامیوں کی اصولی منظوری دی گئی جبکہ کھیلتا پنجاب کے ایتھلیٹ کے کھلاڑیوں کے لئے ای-بائیکس کی فراہمی کی منظوری بھی دے دی گئی۔
