ایس اینڈ جی اے ڈی کی جانب سے جاری مراسلہ میں سرکاری افسران کو سوشل میڈیا پر کسی بھی قسم کے بیان، رائے یا معلومات شیئر کرنے میں انتہائی احتیاط برتنے کی ہدایت کی گئی ہے۔
مراسلے میں بغیر منظوری کے حکومتی پالیسی پر اظہار رائے یا ذاتی آراء دینے کو ممنوع قرار دیا گیا ہے، افسران کا رویہ عوامی تاثر پر براہ راست اثر انداز ہوتا ہے لہٰذا انہیں احتیاط برتنے کی تاکید کی گئی ہے۔
سرکاری ملازمین کیلئے فیس بک، ٹوئٹر، واٹس ایپ، انسٹاگرام، ٹک ٹاک اور یوٹیوب سمیت تمام سوشل میڈیا پلیٹ فارمز پر قواعد کی پابندی لازم قرار دی گئی ہے، سرکاری ملازمین کو ایسا مواد شیئر کرنے اسے اجتناب کی ہدایت کی گئی ہے جس سے قومی سلامتی، امن عامہ یا اخلاقیات متاثر ہوں۔
یہ بھی پڑھیں: ہونہار سکالر شپ اور لیپ ٹاپ سکیم فیز ٹو کا باقاعدہ آغاز
مراسلہ میں حکومت یا عدالت کی توہین، غیر قانونی افعال یا فرقہ واریت کو ہوا دینے والا مواد بھی ناقابل برداشت قرار دیا گیا ہے۔
ایس اینڈ جی اے ڈی کی جانب سے جاری مراسلے میں واضح کیا گیا ہے کہ ذاتی شہرت کے حصول یا سوشل میڈیا پر خود نمائی سرکاری ملازمین کے لیے سختی سے منع ہے لہذا سرکاری ملازمین کے لیے اعلیٰ اخلاقی معیار، دیانت اور ذمہ داری کے ساتھ سوشل میڈیا استعمال کرنا لازمی ہوگا۔
مراسلے میں حکومتی ہدایات پر عمل نہ کرنے والے افسران کے خلاف سخت انضباطی کارروائی کا بھی عندیہ دیا گیا ہے۔
