داہگل ناکہ پر میڈیا سے گفتگو کرتے ہوئے وزیراعلیٰ خیبرپختونخوا علی امین گنڈا پور کا کہنا تھا کہ میری زندگی میں کوئی ایک بھی دن ایسا نہیں جب میں نے عمران خان کی رہائی کی کوشش نہ کی ہو، جتنی کوشش بانی کو باہر لانے کے لئے میں نے کی ہے کسی نے نہیں کی۔

وزیراعلیٰ خیبرپختونخوا نے کہا کہ ہم بار بار کہہ رہے ہیں کہ ہمارے ساتھ مل کر بیٹھیں بات چیت کریں، ہم بانی کی بات کو فالو کرتے ہیں، اس کے علاوہ جو بات کرتا ہے اس سے ہمارا کوئی لینا دینا نہیں۔

ایک سوال کے جواب میں علی امین گنڈا پور کا کہنا تھا کہ عمران خان کا ٹویٹر وہی ہینڈل کر رہا ہے جس کو بانی نے خود اجازت دی ہوئی ہے، پی ٹی آئی ہینڈلرز ہم ہیں، ہم بانی پی ٹی آئی کو جواب دہ ہیں، اب اگر کوئی بندہ اپنا بیانیہ بناتا ہے، تو ان ہینڈلرز کے ہم جواب دہ نہیں ہیں۔

علی امین گنڈاپور نے کہا کہ عمران خان سے ملاقات کی اجازت نہ ملنے سے مسائل اور کنفیوژن پیدا ہوتی ہے اور کچھ ایسے بیانات آجاتے ہیں جس کی بعد میں بانی پی ٹی آئی کو وضاحت کرنا پڑتی ہے، عمران خان تو متعدد بار کہہ چکے ہیں کہ میں تو مذاکرات کے لئے تیار ہوں تو آئیں بیٹھیں بات کریں لیکن بات اسی سے ہوگی جس کے پاس اختیار ہے۔

یہ بھی پڑھیں: یہ لوگ عمران خان کو ایک اور سزا سنانیوالے ہیں، علیمہ خان

ان کا کہنا تھا جب میں وزیر اعلیٰ بنا تو افغان حکومت کے ساتھ مذاکرات کی بات کی جس پر مجھے کہا گیا کہ میرا کام نہیں ہے، جھوٹے الزامات اور سیاسی پراپیگنڈا ہمارے نقصان کی وجہ ہے۔

انہوں نے کہا کہ بجٹ سے پہلے سیاسی دباؤ کے باعث بانی پی ٹی آئی کی واضح ہدایات کی ضرورت تھی ، ہم نے متعدد بار ملاقات کی درخواست کی لیکن ہمیں روکا گیا، پارٹی کی اندرونی تقسیم کی وجہ سے ملاقاتیں روکی جا رہی ہیں۔

وزیراعلیٰ خیبرپختونخوا کا کہنا تھا کہ سینیٹ انتخاب میں نامزدگیاں اور تنازع جیسے پراپیگنڈے پارٹی میں موجود ہیں، بعض لوگ پارٹی کے اندر ایجنڈا چلا رہے ہیں ان کو خبردار کر رہا ہوں آپ کی وجہ سے پارٹی کو نقصان پہنچ رہا ہے۔

علی امین گنڈاپور نے مزید کہا کہ ملکی تاریخ کے بڑے مارچ اور جلسے کئے ہیں، 27 تاریخ کو پختونخوا میں بڑا جلسہ کرنے جا رہے ہیں، عوام کو پیغام پہنچانا ضروری ہے، متحد ہو کر ملک و آئین کا تحفظ ہماری اولین ترجیح ہے۔