مقامی میڈیا رپورٹس کے مطابق ایف آئی اے کی ٹیم نے انجینئر محمد علی مرزا کو راولپنڈی کچہری میں پیش کیا، اس موقع پر سکیورٹی کے سخت انتظامات کیے گئے تھے، انجینئر محمد علی مرزا کو سخت سکیورٹی میں عدالت لایا گیا۔

رپورٹ میں بتایا گیا کہ سینئر سول جج وقار حسین گوندل نے انجینئر محمد علی مرزا کے خلاف کیس کی سماعت کی، ایف آئی اے کی جانب سے ملزم کے 7 روز ہ جسمانی ریمانڈ کی استدعا کی گئی جو عدالت نے منظور کر لی۔

عدالت کی جانب سے حکم دیا گیا کہ ملزم سے تفتیش مکمل کرکے اسے 19 ستمبر کو دوبارہ پیش کیا جائے، بعدازاں جسمانی ریمانڈ منظور ہونے کے بعد ایف آئی اے کی ٹیم انجینئر محمد علی مرزا کو سخت سکیورٹی حصار میں لے کر واپس روانہ ہو گئی۔

یہ بھی پڑھیں: معروف مذہبی سکالر انجینئر محمد علی مرزا گرفتار

یاد رہے کہ نیشنل سائبر کرائم انویسٹی گیشن ایجنسی نے مذہبی سکالر انجینئر محمد علی مرزا کو 25 اگست کی شب جہلم کے مشینی محلہ سے ان کی اکیڈمی سے حراست میں لیا تھا۔

ذرائع کا بتانا ہے کہ انجینئر محمد علی مرزا کو متنازع مذہبی بیان دینے پر ڈپٹی کمشنر جہلم سید میثم عباس کے احکامات پر 3 ایم پی او کے تحت گرفتار کر کے جیل منتقل کر دیا گیا تھا، محمد علی مرزا کی اکیڈمی کو بھی تالے لگا کر سیل کر دیا گیا۔