پی ٹی آئی رہنما اعجاز چودھری کی نااہلی کے باعث خالی ہونے والی سینیٹ کی نشست کے لیے پنجاب اسمبلی میں ووٹنگ کا عمل صبح 9 بجے سے شام 4 بجے تک بلا تعطل جاری رہا، اپوزیشن نے انتخابی عمل کا مکمل بائیکاٹ کیا، ایوان میں 363 اراکین اسمبلی میں سے 251 ممبران نے حق رائے دہی استعمال کیا جبکہ ایک ووٹ مسترد ہوا۔

واضح رہے کہ مسلم لیگ (ن) اور حکومتی اتحادی جماعتوں کی جانب سے رانا ثناء اللہ کو میدان میں اتارا گیا تھا جبکہ اپوزیشن نے اعجاز چودھری کی اہلیہ سلمیٰ اعجاز کو نامزد کیا تھا۔

نو منتخب سینیٹر رانا ثنا اللہ کا کہنا تھا کہ تحریک انصاف نے سیاسی و جمہوری عمل کا بائیکاٹ کر کے انتخابات سے راہ فرار اختیار کی ، ان کا الیکشن سے بائیکاٹ اپنے ممبران پر عدم اعتماد ہے۔

یہ بھی پڑھیں: چودھری پرویز الہٰی نے حکومت کو آڑے ہاتھوں لے لیا

انہوں نے کہا کہ پی ٹی آئی امیدواروں نے کاغذات داخل کیے پڑتال کا پراسیس مکمل کیا پھر وہ اسٹے لینے ہائیکورٹ چلے گئے، جب تحریک انصاف کو ہائیکورٹ سے ناکامی ہوئی تو انہوں نے بائیکاٹ کا راستہ اختیار کرلیا۔

رانا ثناء اللہ کا کہنا تھا کہ تحریک انصاف کو شکست کا خوف تھا ، ان کے 10 سے 12 ممبران نے مجھ سے رابطہ کیا تھا، تحریک انصاف کے کچھ ممبران مجھے ووٹ کاسٹ کرنا چاہتے تھے لیکن میں نے ان کو منع کیا تھا کہ مجھے ووٹ کاسٹ نہ کریں اپنے امیدوار کو ووٹ کاسٹ کریں۔

مشیر وزیراعظم نے کہا کہ کابینہ وزیراعظم کی ٹیم ہوتی ہے میں اس کا حصہ ہوں، کیبنٹ کا ہر وزیر اپنی ذمہ داری اچھے انداز سے نبھا رہا ہے، ایسا نہیں ہوتا کہ ایک دوسرے کی جگہ تبدیل کر دی جائے، میں پہلے بھی اپنے فرائض دیانت داری سے سرانجام دے رہا ہوں، شہباز شریف جو بھی ذمہ داری دیں گے اس کو دیانت داری سے نبھاؤں گا۔