پی ڈی ایم اے کے مطابق یکم سے 5 ستمبر تک دریائے راوی، ستلج اور چناب میں انتہائی اونچے درجے کے سیلاب کا خدشہ ہے،گنڈا سنگھ والا کے مقام پر اونچے درجے کے سیلاب کی صورتحال برقرار رہے گی جبکہ 3 ستمبر تک دریاؤں کے بالائی حصوں میں شدید بارشوں کا امکان ہے۔

ترجمان پی ڈی ایم اے نے کہا کہ اگلے 24 گھنٹوں میں دریائے چناب میں ہیڈ تریموں کے مقام پر انتہائی اونچے درجے کا سیلاب ہوگا، پی ڈی ایم اے نے متعلقہ تمام کمشنرز و ڈپٹی کمشنرز کو الرٹ جاری کردیا ہے۔

انہوں نے بتایا کہ لاہور، ساہیوال، گوجرانوالہ، سرگودھا، فیصل آباد ، بہاولپور، ملتان اور ڈیرہ غازی خان کے کمشنرز کو الرٹ جاری کیا گیا ہے، سیالکوٹ، شیخوپورہ، لاہور، قصور، ننکانہ صاحب، اوکاڑہ، فیصل آباد، ساہیوال، ٹوبہ ٹیک سنگھ، گجرات، وزیر آباد کے ڈپٹی کمشنرز کو بھی الرٹ جاری کیا گیا ہے۔

اسی طرح گوجرانوالہ، منڈی بہاؤالدین، حافظ آباد، سرگودھا، چنیوٹ، خانیوال، کوٹ ادو ، جھنگ ، رحیم یار خان، راجن پور، پاکپتن، بہاولنگر، وہاڑی، لودھراں، لیہ، ملتان، بہاولپور اور مظفر گڑھ کے ڈپٹی کمشنرز کو بھی پی ڈی ایم اے کی جانب سے الرٹ جاری کیا گیا ہے۔

یہ بھی پڑھیں: پنجاب میں بدترین سیلاب سے کتنی اموات ہوئیں؟

ریلیف کمشنر پنجاب نبیل جاوید نے کمشنرز، ڈپٹی کمشنرز اور دیگر حکام کو ممکنہ صورتحال بارے الرٹ رہنے کی ہدایات جاری کی ہیں۔

ڈی جی پی ڈی ایم عرفان علی کاٹھیا نے کہا ہے کہ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اور محکمہ ٹرانسپورٹ کو الرٹ جاری کر دیا گیا ہے جبکہ متعلقہ محکموں کو الرٹ رہنے کی ہدایات کی ہیں،وزیر اعلیٰ پنجاب کی ہدایات کے پیش نظر تمام تر انتظامات مکمل ہیں۔

ان کا کہنا تھا کہ ایمرجنسی کنٹرول رومز میں سٹاف الرٹ ہے،عوام جاری کردہ احتیاطی تدابیر پر عمل کریں۔