ذرائع کے مطابق بانی پی ٹی آئی عمران خان سے ان کی بہنوں کی ملاقات نہ ہونے دینے کے معاملہ پر پیٹرن انچیف پی ٹی آئی کے وکیل تابش فاروق نے وزیر اعلیٰ پنجاب مریم نواز، جیل و پولیس افسران کیخلاف اندراج مقدمہ کیلئے درخواست سی پی او راولپنڈی سید خالد ہمدانی کو بذریعہ ڈاک بھجوائی۔

اندراج مقدمہ کی درخواست میں سپرنٹنڈنٹ اڈیالہ جیل غفور انجم، اے ایس پی زینب سمیت دیگر پولیس افسران کا نام بھی شامل ہے۔

وکیل تابش فاروق نے سی پی او راولپنڈی کو بذریعہ ڈاک بھجوائی گئی درخواست میں مؤقف اختیار کیا کہ بانی پی ٹی آئی عمران خان کو جیل میں قواعد کے مطابق سہولیات میسر نہیں ہیں اور نہ ہی انہیں ڈاکٹروں سے ملنے نہیں دیا جا رہا ہے، پولیس و جیل حکام ہائیکورٹ احکامات کی خلاف ورزی کرکے توہین عدالت کے مرتکب ہو رہے ہیں۔

درخواست گزار نے کہا کہ اے ایس پی اور پولیس افسران و اہلکار ہر منگل کو بہنوں کو جیل سے دور ناکوں پر روک لیتے ہیں، علیمہ خان، نورین خانم اور ڈاکٹر عظمی کو ہراساں و پریشان کیا جاتا ہے، پولیس افسران بانی کی بہنوں کو اغوا کر کے سنسان جگہوں پر چھوڑ دیتے ہیں۔

یہ بھی پڑھیں: حماد اظہر این اے 129 کے ضمنی الیکشن سے دستبردار

بانی پی ٹی آئی کے وکیل نے درخواست میں کہا کہ بانی پی ٹی آئی کے سیل میں روشنی تک نہیں، انہیں اندھیرے میں رکھا جاتا ہے، عمران خان کے اہل خانہ کو ملاقات تک کی اجازت نہیں، اڈیالہ جیل پنجاب کی حدود میں آتی ہے، پانی پی ٹی آئی کے خلاف یہ تمام اقدامات مریم نواز کی ایماء پر کیے جا رہے ہیں۔

درخواست میں کہا گیا کہ پانی پی ٹی آئی کو وزیراعلیٰ پنجاب کی ہدایت پر جیل میں قیدی کے حقوق تک نہیں دیے جا رہے ، وزیر اعلیٰ پنجاب مریم نواز اپنی تقاریر میں بھی بانی پی ٹی آئی عمران خان کو فتنہ قرار دے چکی ہیں، مریم نواز نے دھمکیاں دیں کہ بانی ایک فتنہ ہیں جسے ختم کیا جا رہا ہے۔

وکیل تابش فاروق کا درخواست میں مزید کہنا تھا کہ ان تمام درج ذیل افراد کیخلاف مقدمہ درج کر کے قانونی کارروائی کی جائے۔