موسم کا احوال بتانے والوں کا کہنا ہے کہ 22 اگست سے مون سون ہواؤں کا شدت کے ساتھ بالائی علاقوں میں داخل ہونے کا امکان ہے، یہ مون سون ہوائیں بحیرہ عرب اور خلیج بنگال سے پاکستان میں داخل ہوں گی۔

محکمہ موسمیات کے مطابق 23 سے27 اگست کے دوران جڑواں شہروں اسلام آباد، راولپنڈی، لاہور، گوجرانوالہ، سیالکوٹ، نارووال، فیصل آباد، سرگودھا میں بارشیں متوقع ہیں، 23 سے 27 اگست کےد وران خوشاب، میانوالی، بھکر، لیہ، ڈی جی خان اور ملتان میں بھی جم کر بادل برسیں گے۔

جنوبی پنجاب کے اضلاع بھکر، لیہ، مظفرگڑھ، ڈی جی خان، راجن پور اور رحیم یار خان میں بھی 23 سے 25 اگست کے دوران بارشیں متوقع ہیں۔

اسی طرح خیبرپختونخوا کے مختلف اضلاع میں بھی 23 سے 26 اگست کے دوران پشاور، چارسدہ، نوشہرہ، مردان، کوہاٹ، بنوں، لکی مروت، ڈی آئی خان اور باجوڑ میں مون سون رنگ دکھائے گا۔

یہ بھی پڑھیں: ملک بھر میں شدید بارشوں کا الرٹ، اربن فلڈنگ کا خدشہ

محکمہ موسمیات نے 23 سے26 اگست کے دوران گلگت بلتستان اورکشمیر میں بھی تیز بارش اور ژالہ باری کا امکان ظاہر کیا ہے جبکہ 23 سے 25 اگست کے دوران بلوچستان کے اضلاع کوئٹہ، ژوب، شیرانی، بارکھان، خضدار، قلعہ عبداللہ، قلعہ سیف اللہ، پنجگور اور کیچ میں بارشوں کا امکان ہے۔

محکمہ موسمیات کی جانب سے 23 سے 25 اگست کے دوران کراچی میں بھی بارش کا امکان ظاہر کیا گیا ہے جبکہ اسی دورانے میں سکھر، لاڑکانہ، شہید بینظیر آباد، دادو، جیکب آباد اور جامشورو میں بھی بادل برسیں گے۔

محکمہ موسمیات کا کہنا ہے کہ موسلادھار بارشوں کے باعث راولپنڈی، لاہور، گوجرانوالہ، سیالکوٹ، نارووال، پشاور، نوشہرہ، مردان، ایبٹ آباد، مانسہرہ، دیر، گلگت بلتستان اور کشمیر میں فلیش فلڈنگ کا اندیشہ ہے۔