صوبائی وزیر ٹرانسپورٹ پنجاب بلال اکبر کی زیر صدارت اجلاس ہوا جس کے دوران گفتگو کرتے ہوئے انہوں نے بتایا کہ لاہور میں ٹرام کا کامیاب ٹیسٹ کیا گیا ، فیصلہ کیا گیا ہے ٹرام ٹھوکر سے ہربنس پورہ تک آئندہ برس فروری 2026 سے چلائی جائے گی۔

بلال اکبر نے بتایا کہ پراجیکٹ کے لیے نیسپاک پنجاب اور پی ایم اے افسران نے چین کا دورہ کیا ، ٹرام میں 270 افراد کی گنجائش ہوگی، منصوبے پر 30 لاکھ ڈالر لاگت کا تخمینہ لگایا گیا ہے۔

صوبائی وزیر ٹرانسپورٹ کا کہنا تھا کہ پنجاب حکومت نے فیصل آباد اور گوجرانوالہ میں بھی میٹرو ٹرین چلانے کا فیصلہ کیا ہے، فیصل آباد میٹرو ٹرین سے روزانہ 3 لاکھ مسافر سفری سہولیات سے مستفید ہوں گے جبکہ گوجرانوالہ میٹرو ٹرین یومیہ ایک لاکھ 40 ہزار مسافر سفری سہولت حاصل کر سکیں گے۔

یہ بھی پڑھیں: الیکٹرک ٹرام منصوبے پر اہم پیش رفت

بلال اکبر خان نے بتایا کہ فیصل آباد میٹرو ٹرین پراجیکٹ کی لاگت 110 ملین ڈالر مقرر کی گئی ہے جبکہ گوجرانوالہ میٹرو ٹرین منصوبے پر 50 ملین ڈالر لاگت کا تخمینہ لگایا گیا ہے۔

صوبائی وزیر نے مزید کہا کہ لاہور میں موٹرسائیکلیں اور گاڑیاں ماحولیاتی آلودگی میں اضافے کا سبب بن رہی ہیں، ٹرام اور میٹرو منصوبوں سے ماحولیاتی آلودگی پر قابو پانے میں مدد ملے گی، اگلے چند ماہ میں 1100 الیکٹرک بسیں بھی پوری کرنے جا رہے ہیں۔