وزارت انفارمیشن ٹیکنالوجی و ٹیلی کمیونیکیشن کے مطابق یہ سروس ان علاقوں میں بھی کام کرے گی جہاں موبائل نیٹ ورک ٹاورز خراب یا غیر فعال ہوں تاکہ شہری ہنگامی صورتحال میں مدد حاصل کر سکیں۔

متاثرہ افراد کسی بھی ایمرجنسی کی صورت میں 911 ڈائل کر سکتے ہیں۔ تاہم، حکام نے عوام سے اپیل کی ہے کہ وہ غیر ضروری کالز سے گریز کریں تاکہ یہ سسٹم صرف ضرورت مند افراد کے لیے دستیاب رہے۔

علاوہ ازیں، یہ اقدام اس وقت کیا گیا جب خیبر پختونخوا، آزاد کشمیر، اور گلگت بلتستان میں شدید بارشوں، کلاؤڈ برسٹ اور طوفانی سیلابوں نے تباہی مچا دی ہے۔ شمالی علاقوں میں اب تک 250 سے زائد افراد جاں بحق ہو چکے ہیں۔ صرف بونیر میں 150 سے زائد اموات رپورٹ ہو چکی ہیں جبکہ متعدد افراد تاحال لاپتہ ہیں۔

یہ بھی پڑھیں: ہیلی کاپٹر کریش کا معاملہ، خیبرپختونخوا حکومت کا تحقیقات کا فیصلہ

پورے کے پورے دیہات صفحۂ ہستی سے مٹ گئے ہیں، گھر تباہ ہو چکے ہیں اور مویشی و گاڑیاں سیلابی ریلوں میں بہہ چکی ہیں۔ زندہ بچ جانے والے افراد بدترین حالات میں پھنسے ہوئے ہیں کیونکہ انفراسٹرکچر اور مواصلاتی نظام مکمل طور پر متاثر ہو چکے ہیں۔

صورتحال کی سنگینی کے پیشِ نظر، وزیر اعظم شہباز شریف نے ہدایت دی ہے کہ خیبر پختونخوا میں فوری طور پر ٹرکوں کے ذریعے امدادی سامان پہنچایا جائے۔

واضح رہے کہ حکومت نے قومی ایمرجنسی کی حالت میں ریسکیو اور ریلیف آپریشنز تیزکرنے کا عزم ظاہر کیا ہے تاکہ متاثرہ کمیونٹیز کو بروقت مدد فراہم کی جا سکے۔