ذرائع کے مطابق وزیراعلیٰ خیبرپختونخوا علی امین گنڈاپور نے ہیلی کاپٹر کریش معاملے پر تحقیقات کی ہدایات جاری کر دیں، ہیلی کاپٹر میں سوار 5 افراد کی شناخت کے لیے ڈی این اے ٹیسٹ کیا جائے گا۔

قبل ازیں وزیراعلیٰ خیبرپختونخوا علی امین گنڈاپور نے صوبے میں موجودہ ہنگامی صورتحال سے متعلق ویڈیو پیغام میں کہا کہ صوبے خصوصاً ملاکنڈ اور ہزارہ ریجنز میں کلاؤڈ برسٹ اور بارشوں کی وجہ سے بھیانک قسم کے سیلابی ریلے آئے ہیں، جس کے نتیجے میں مختلف حادثات سے بہت زیادہ جانی و مالی نقصانات ہوئے ہیں۔

انہوں نے کہا کہ اس صورتحال میں لوگوں کو ریسکیو کرنے کے لئے صوبائی حکومت کے دو ہیلی کاپٹرز کام کر رہے تھے، ان میں سے ایک ہیلی کاپٹر خراب موسم کی وجہ سے افسوسناک حادثے کا شکار ہوا جس کے نتیجے میں عملے کے پانج افراد شہید ہوئے، اس ہنگامی صورتحال میں ضلعی انتظامیہ اور صوبائی حکومت کے تمام متعلقہ محکمے اور ادارے ریسکیو اور ریلیف کارروائیوں میں مصروف ہیں۔

یہ بھی پڑھیں: خیبرپختونخوا حکومت کا ہیلی کاپٹر کریش، 5 افراد شہید

علی امین گنڈاپور کا کہنا تھا کہ ہم لوگوں کے جان و مال کے تحفظ کے لئے تمام اقدامات یقینی بنا رہے ہیں، وزیر اعلیٰ ہاؤس میں کنٹرول روم کے ذریعے تمام صورتحال کی مانیٹرنگ کی جا رہی ہے، متاثرہ اضلاع کے ساتھ ساتھ دیگر اضلاع کی انتظامیہ کو بھی ہائی الرٹ کیا گیا ہے۔

وزیراعلیٰ نے کہا کہ دیگر اضلاع میں بھی حفاظتی اقدامات اٹھائے جارہے ہیں، متاثرہ علاقوں میں ریسکیو کارروائیوں اور بند سڑکوں کو کھولنے کے لئے ہیوی مشینری لگا دی گئی ہے، املاک کو پہنچنے والے نقصانات کے ازالے کے لئے بھی اقدامات کئے جا رہے ہیں، مشکل کی اس گھڑی میں صوبائی حکومت اپنی عوام کے ساتھ کھڑی ہے۔

ان کا کہنا تھا کہ صوبائی حکومت ان قدرتی آفات سے ہونے والے نقصانات کا مکمل ازالہ کرے گی، عوام سے اپیل ہے احتیاطی تدابیر اپنائیں اور اس سلسلے میں انتظامیہ کے ساتھ مکمل تعاون کریں، ہمارے منتخب عوامی نمائندے بھی اس وقت متاثرہ علاقوں میں موجود ہیں، ہم سب مل کر بہت جلد اس صورتحال پر قابو پا لیں گے۔