این ڈی ایم اے نے موسمی صورتحال سے متعلق جاری تازہ ایڈوائزری میں بتایا ہے کہ 18 اگست سے 22 اگست تک خیبر پختونخوا کے مختلف شہروں چترال، دیر، ہری پور، کرک، کوہاٹ، کوہستان، خیبر، کرم، مانسہرہ، مہمند، نوشہرہ، مالاکنڈ، چارسدہ، ایبٹ آباد، بنوں، بونیر، ہزارہ، پشاور، صوابی، سوات، وزیرستان اور اطراف میں بارشیں متوقع ہیں۔

ایڈوائزری کے مطابق گلگت بلتستان اور آزاد کشمیر میں 18 سے 22 اگست کے درمیان استور، اسکردو، ہنزہ، شگر، باغ، وادی نیلم، مظفر آباد اور اطراف میں مختلف مقامات پر بارش کا امکان ہے۔

این ڈی ایم اے کی جانب سے بتایا گیا کہ 18 سے 20 اگست کے درمیان جڑواں شہروں اسلام آباد، راولپنڈی سمیت پنجاب کے مختلف اضلاع مری، گلیات، اٹک، چکوال، جہلم، میانوالی، حافظ آباد، سرگودھا، فیصل آباد، سیالکوٹ، نارووال، اوکاڑہ، لاہور، گوجرانوالہ، گجرات، ملتان، بہاولپور، بہاولنگر، رحیم یار خان اور اطراف میں بادل برسنے کی توقع ہے۔

یہ بھی پڑھیں: خیبرپختونخوا میں بارشوں اور سیلاب سے تباہی، 78 افراد جاں بحق

اسی طرح سندھ میں بھی 18 سے 20 اگست کے درمیان سکھر، لاڑکانہ، جیکب آباد، خیر پور، کراچی، حیدرآباد، تھر پارکر، ٹھٹہ، بدین، میرپورخاص اور گردونواح میں بارشوں کی پیشگوئی کی گئی ہے۔

ایڈوائزری کے مطابق بلوچستان میں 18 تا20 اگست زیارت، قلات، مشکیل، خضدار، آواران، بارکھان، سبی، جعفرآباد، ڈیرہ بگٹی اور اطراف میں بادل برسنے کی توقع ہے۔

دوسری جانب خیبرپختونخوا اور ملک کے بالائی علاقوں میں شدید طوفانی بارشوں اور کلاؤڈ برسٹنگ کے پیش نظر پنجاب میں بھی پی ڈی ایم اے نے الرٹ جاری کر دیا ہے۔

ڈی جی پی ڈی ایم اے عرفان علی کاٹھیا نے کہا ہے کہ مون سون بارشوں کا نیا سپیل قدرے زیادہ طاقتور ہے، پنجاب کے مختلف اضلاع میں طوفانی بارشوں کی پیشگوئی ہے، اس تناظر میں دریاؤں، ندی نالوں اور نشیبی علاقوں کی 24 گھنٹے مانیٹرنگ کو یقینی بنایا جائے۔