وزیرِ اعظم محمد شہباز شریف کی زیر صدارت ملک میں حالیہ بارشوں کے باعث سیلاب کی صورتحال کے جائزے کیلئے ہنگامی اجلاس ہوا جس میں چیئرمین این ڈی ایم اے لیفٹیننٹ جنرل انعام حیدر ملک نے وزیرِ اعظم کو ملک کے بالائی حصوں میں کلاؤڈ برسٹ، فلیش فلڈز سے ہونے والے نقصانات اور ریسکیو و ریلیف آپریشن پر بریفنگ دی۔

دوران اجلاس وزیرِ اعظم کو اجلاس میں نقصانات کا جائزہ پیش کرنے کے ساتھ ساتھ ریسکیو و ریلیف آپریشن پر پیش رفت سے بھی آگاہ کیا گیا۔

وزیرِ اعظم نے این ڈی ایم اے کو خیبر پختونخوا کی صوبائی حکومت اور پی ڈی ایم اے کے ساتھ تعاون جاری رکھنے، انہیں ریسکیو و ریلیف آپریشن میں تمام تر تعاون فراہم کرنے اور اس کے لئے تمام وسائل بروئے کار لانے کی ہدایت کردی۔

محمد شہباز شریف نے چیئرمین این ڈی ایم اے کو خیبر پختونخوا کی صوبائی حکومت سے ریسکیو و امدادی سرگرمیوں کیلئے رابطے مزید مربوط کرنے کی ہدایت کرتے ہوئے کہا کہ خیبر پختونخوا حکومت کو خیمے، ادویات، اشیائے خورونوش اور دیگر امدادی سامان فوری پہنچایا جائے۔

وزیراعظم نے ہدایت کی کہ ترجیحی بنیادوں پر امدادی سامان کو ٹرکوں کے ذریعے فوری بھیجا جائے، سیلاب سے متاثرہ علاقوں میں پھنسے لوگوں اور سیاحوں کو فوری محفوظ مقامات پر پہنچایا جائے۔

یہ بھی پڑھیں: خیبرپختونخوا، بارشوں اور سیلاب سے تباہی، 78 افراد جاں بحق

دریں اثناء وزیرِ اعظم شہباز شریف نے گورنر خیبر پختونخوا فیصل کریم کنڈی اور وزیرِ اعلیٰ خیبر پختونخوا علی امین گنڈا پور سے بھی ٹیلی فون پر گفتگو کی، وزیرِ اعظم نے خیبر پختونخوا میں حالیہ کلاؤڈ برسٹ اور فلیش فلڈز کے نتیجے میں قیمتی جانوں کے ضیاع پر گہرے افسوس کا اظہار کیا۔

وزیراعلیٰ علی امین گنڈاپور سے گفتگو کرتے ہوئے وزیراعظم شہباز شریف نے کہا کہ این ڈی ایم اے کو ہدایت کی ہے کہ و صوبائی حکومت کی ریسکیو و ریلیف آپریشن میں ہر قسم کی معاونت کریں، وفاقی حکومت صوبائی حکومت کی ہر قسم کی مدد کرے گی۔

وزیراعظم کا کہنا تھا کہ وفاقی حکومت ادویات، خیمے اور اشیائے خورونوش بھیج رہی ہے، مشکل کی اس گھڑی میں ہماری تمام تر ہمدردیاں متاثرین کے ساتھ ہیں۔