خبر ایجنسی کے مطابق مقبوضہ جموں و کشمیر کے ضلع کشتواڑ کے گاؤں چشوٹی میں کلاؤڈ برسٹ نے تباہی مچادی، سیلابی صورتحال کے 44 افرا د ہلاک جبکہ 102 زخمی ہو گئے، سیلابی ریلے کی زد میں آکر 50 سے زائد افراد لاپتا ہیں جبکہ ہلاکتوں میں اضافے کا خدشہ بھی ظاہر کیا جارہا ہے۔

غیر ملکی میڈیا رپورٹس کے مطابق مقامی انتظامیہ نے تصدیق کی ہے کہ نیشنل ڈیزاسٹر ریسپانس فورس اور اسٹیٹ ڈیزاسٹر ریسپانس فورس کی جانب سے امدادی کارروائیوں کا آغاز کردیا گیا ہے اور ہر ممکن کوشش کی جارہی ہے کہ سیلابی صورتحال میں پھنسے لوگوں کو محفوظ مقام پر منتقل کیا جائے۔

مقامی انتظامیہ کی جانب سے بتایا گیا کہ امدادی کارروائیوں کے لیے تمام دستیاب وسائل کو بروئے کار لایا جارہا ہے تاہم سیلاب کے باعث سڑکوں کی تباہی اور دشوار گزار راستوں کے باعث کارروائیوں میں مشکلات کا سامنا ہے۔

یہ بھی پڑھیں: پنجاب میں بارشوں کے دوران 119 افراد جاں بحق

رپورٹس میں بتایا کہ یہ واقعہ دوپہر ایک بجے کے قریب پیش آیا جب مچا ئل ماتا یاترا کے دوران بڑی تعداد میں زائرین علاقے میں موجود تھے، سیلابی صورتحال کے باعث علاقے میں لگائے گئے لنگر کے کمیونٹی کچن کو نقصان پہنچا۔

غیر ملکی میڈیا رپورٹس کے مطابق چشوٹی گاؤں کشتواڑ سے 90 کلو میٹر دور اور 9 ہزار 500 فٹ کی بلندی پر واقع ہے ،مچا ئل ماتا مندر تک جانے کیلئے 8.5 کلومیٹر کا پیدل سفر کرنا پڑتا ہے، رواں برس مچائل ماتا یاترا کیلئے بڑی تعداد میں زائرین علاقے میں موجود تھے۔