نوجوانوں کے عالمی دن کی مناسب سے منعقدہ ایک تقریب سے خطاب کے دوران وزیراعظم شہباز شریف کا کہنا تھا کہ وفاقی دارالحکومت ، چاروں صوبوں، گلگت بلتستان اور آزاد کشمیر میں لیپ ٹاپ تقسیم کیے جائیں گے، یہ لیپ ٹاپ سود پر مبنی قرضوں کے ذریعے لیپ ٹاپ سکیم کے علاوہ ہوں گے۔

وزیراعظم نے کہا کہ ملک کا مستقبل نوجوانوں کے ہاتھوں میں ہے، پاکستان کی ترقی و خوشحالی کے لیے میرٹ پر عملدرآمد کو ہر صورت یقینی بنایا جائے گا۔

پاک بھارت کشیدگی کے حوالے سے بات کرتے ہوئے شہباز شریف کا کہنا تھا کہ چار روز کی جنگ میں ہمارے بہادر جوانوں نے دشمن کو وہ سبق سکھایا جو وہ رہتی دنیا تک نہیں بھول پائے گا، 6 اور 10 مئی کو افواج پاکستان نے دشمن پر کاری ضرب لگائی۔

یہ بھی پڑھیں: وزیراعلیٰ مریم نواز کا عوام کیلئے ایک اور بڑا تحفہ

انہوں نے کہا کہ پاک فضائیہ بہادر جوانوں نے چار رافیل سمیت بھارت کے چھ طیارے مار گرائے، دس مئی کو بھارت کا غرور خاک میں مل گیا، دشمن یاد رکھے پاکستان کے حصے کے پانی کی ایک بوند بھی چھین نہیں سکتا۔

وزیراعظم نے مودی سرکار کو للکارتے ہوئے کہا کہ دشمن نے اگر دوبارہ ایسی حرکت کی کوشش کی تو ایسا سبق سکھائیں گے کہ وہ کانوں کو ہاتھ لگائے گا، سندھ طاس معاہدے کے تحت بھارت کسی بھی صورت پاکستان کا پانی نہیں روک سکتا۔