سماجی رابطوں کی ویب سائٹ ایکس (سابقہ ٹویٹر) پر جاری ایک پیغام میں وزیراعلیٰ پنجاب مریم نواز کا الیکٹرک بسوں کی تصاویر شیئر کرتے ہوئے کہنا تھا کہ چین کے یانٹائی پورٹ پر 100 الیکٹرک بسوں کا ایک اور فلیٹ لوڈ کیا جا رہا ہے، جو آج رات پاکستان روانہ ہونے کا امکان ہے۔
انہوں نے کہا کہ یہ الیکٹرک بسیں پنجاب کے ان اضلاع کے لیے روانہ ہوں گی جہاں پہلے پبلک ٹرانسپورٹ کا کوئی باقاعدہ نظام موجود نہیں تھا، ان اضلاع میں میانوالی، اوکاڑہ، ننکانہ صاحب، مظفرگڑھ، وہاڑی، پاکپتن اور ڈیرہ غازی خان شامل ہیں۔
Another fleet of 100 electric buses is being loaded at Yantai Port, China, and is expected to set sail tonight. These buses are destined for previously underserved districts of Punjab, including Mianwali, Okara, Nankana Sahib, Muzaffargarh, Vehari, Pakpattan, and Dera Ghazi Khan,… pic.twitter.com/Pr0FPwoF8d
— Maryam Nawaz Sharif (@MaryamNSharif) August 12, 2025
وزیراعلیٰ پنجاب کا کہنا تھا کہ اس سروس کا کرایہ صرف 20 روپے ہو گا، شہری جدید، ماحول دوست ایئر کنڈیشنڈ اور وائی فائی سے مزین سفری سہولت سے مستفید ہو سکیں ، ان بسوں میں مکمل خودکار ٹکٹنگ سسٹم نصب ہوگا۔
مریم نواز نے مزید کہا کہ یہ بسیں معذور افراد کے لیے بھی قابل رسائی ہوں گی اور پنجاب کے شہریوں کو محفوظ، آرام دہ اور پُراعتماد سفر کا تجربہ فراہم کریں گی۔
واضح رہے کہ رواں برس ہی لاہورمیں 27 الیکٹرک بسوں کو تجرباتی طور پر چلایا گیا تھا اور یہ تجربہ کامیاب رہا، لاہور میں الیکٹرک بسوں کی لانچنگ کے وقت وزیراعلیٰ پنجاب مریم نواز نے مزید الیکٹرک بسیں دیگر شہروں کے لیے بھی لانے کا اعلان کیا تھا۔
یہ بھی پڑھیں: لاہور میں الیکٹرک ٹرام منصوبے پر اہم پیش رفت، نیا روٹ فائنل
خیال رہے کہ صوبائی دارالحکومت لاہور میں پنجاب حکومت کی جانب سے الیکٹرک ٹرام سروس بھی شروع کی گئی ہے جسے فی الوقت ٹرائل کی بنیاد پر چلایا جارہا ہے تاہم ٹرام کی سہولت ابھی شہریوں کیلئے شروع نہیں ہوئی۔
الیکٹرک ٹرام کے لیے ٹھوکر سے ہربنس پورہ تک روٹ فائنل کیا گیا ہے، ٹرام کو کینال روڈ کے انتہائی بائیں جانب مخصوص ٹریک پر چلایا جائے گا تاکہ ٹریفک کا بہاؤ متاثر نہ ہو۔
