نیب ذرائع کی جانب سے کہا گیا ہے کہ پیٹرن انچیف پاکستان تحریک انصاف عمران خان کی جائیدادوں کو نیلام کرنے کے حوالے سے سامنے آنے والی خبروں میں کوئی صداقت نہیں ہے۔

ذرائع کے مطابق سابق وزیراعظم عمران خان 190 ملین پاؤنڈ کیس میں سرنڈر کر چکے ہیں، اس کیس میں بانی پی ٹی آئی کی جائیدادوں کو نیلام کرنے کا کوئی حکم موجود نہیں اور نہ ہی ان کی کوئی جائیداد 190ملین پاونڈ کیس کے فیصلے میں شامل ہے، جائیدادوں کی نیلامی کے احکامات صرف اشتہاری ملزمان کی حد تک ہیں۔

یہ بھی پڑھیں: عمران خان کے طبی معائنے کیلئے عدالت میں درخواست دائر

نیب ذرائع کی جانب سے بتایا گیا کہ عدالتی احکامات پر ضلعی انتظامیہ کی جانب سے 3 جائیدادوں موضع موہڑہ نور میں 405 کنال اراضی اور 248 کنال اراضی کی نیلامی کیلئے آج کی تاریخ مقرر تھی۔

علاوہ ازیں 3 کلب روڈ اسلام آباد کی زمین بھی نیلامی میں شامل ہے، زمین مفرور ملزمان کے اشتہاری ہونے پر ضبط کی گئی تھی۔