پنجاب اسکول ایجوکیشن ڈیپارٹمنٹ نے میرٹ کی بنیاد پر منتخب ہونے والی امیدواروں کے لیے شفاف پوائنٹس پر مبنی نظام متعارف کرادیا ہے۔ اساتذہ کی جانچ چھ اہم زمروں میں کی جائے گی: اسکول سے گھر تک فاصلے پر ہر کلومیٹر کے بدلے دو پوائنٹس دیے جائیں گے (زیادہ سے زیادہ 20 پوائنٹس)، جبکہ بیوہ، طلاق یافتہ یا خودمختار خواتین کو 20 پوائنٹس، وہ خواتین جن کے شوہر بیرونِ ملک کام کرتے ہیں کو 15 پوائنٹس اور جن کے شوہر دوسرے شہروں میں کام کرتے ہیں اُنہیں 10 پوائنٹس دیے جائیں گے۔

اسکول کی تعیناتی کی جگہ بھی اہمیت رکھتی ہے جیسے کہ سرحدی یا مشکل رسائی والے علاقوں میں تعیناتی پر 20 پوائنٹس، دیہی علاقوں پر 15 اور شہری علاقوں پر 10 پوائنٹس دیے جائیں گے۔ ڈرائیونگ لائسنس رکھنے والی خواتین کو 10 پوائنٹس، اور لرنر پرمٹ رکھنے والی کو 5 پوائنٹس ملیں گے۔

 سینئرٹی کی بنیاد پر ہر سال کی سروس کے لیے 2 پوائنٹس دیے جائیں گے (زیادہ سے زیادہ 20 پوائنٹس) جبکہ تعلیمی قابلیت کے لحاظ سے پی ایچ ڈی کرنے والی اساتذہ کو 10 پوائنٹس، ایم فل یا ایم ایس پر 8 پوائنٹس، اور ایم اے، ایم ایس سی یا بی ایس کی ڈگری رکھنے والی کو 5 پوائنٹس دیے جائیں گے۔ اگر دو امیدواروں کے پوائنٹس برابر ہوں تو عمر میں بڑی اُمیدوار کو ترجیح دی جائے گی۔

یہ بھی پڑھیں: سندھ: یوم آزادی پر اقلیتی محنت کشوں کو ای بائیکس دینے کا فیصلہ

واضح رہے کہ یہ میرٹ سسٹم خواتین اساتذہ کی حقیقی زندگی کی مشکلات، جیسے طویل سفر اور واحد کفیل ہونے جیسے مسائل کو مدنظر رکھتے ہوئے ترتیب دیا گیا ہے۔ اس میں خودمختاری، تعیناتی کی جگہ اور تعلیمی قابلیت جیسے عوامل کو اہمیت دے کر نہ صرف صنفی مساوات کو فروغ دیا گیا ہے بلکہ پاکستانی معاشرے میں خواتین اساتذہ کی خدمات کا اعتراف بھی کیا گیا ہے۔

یاد رہے کہ یہ اسکیم صرف سفر کی سہولت تک محدود نہیں بلکہ یہ خواتین اساتذہ کو بااختیار بنانے، اُن کی حوصلہ افزائی کرنے، اور خاص طور پر دور دراز اور محروم علاقوں میں کام کرنے والی اساتذہ کی عزت افزائی کا ذریعہ ہے۔ محفوظ اور قابلِ اعتماد سفر کی سہولت فراہم کرکے حکومت وقت کی پابندی، رسائی اور ان خواتین کی محنت کی قدر کر رہی ہے جو روزمرہ کے مسائل کے باوجود تدریسی فرائض بخوبی انجام دیتی ہیں۔