وزیرِ اعظم شہباز شریف کی زیر صدارت خصوصی اجلاس ہوا جس میں ملک میں الیکٹرک بائیکس، رکشہ او ر لوڈر کے حصول میں حکومتی معاونت کاجائزہ لیا گیا۔

اجلاس کے شرکاء کو ملک میں الیکٹرک وہیکلز کی تیاری کے حوالے سے صنعت کی موجودہ صورتحال اور عام آدمی کی ان تک رسائی کیلئے حکومتی معاونت کے اقدامات پر بریفنگ دی گئی۔

دوران اجلاس وزیراعظم شہباز شریف نے اعلان کیا کہ حکومت کی جانب سے ترجیحی بنیادوں پر بیروزگار افراد کو الیکٹرک رکشے اور لوڈر فراہم کیے جائیں گے، وفاقی حکومت بشمول وفاقی بورڈ، ملک بھرکے تعلیمی بورڈز کے ٹاپ پوزیشن ہولڈرز کو الیکٹرک بائیکس فراہم کرے گی۔

یہ بھی پڑھیں: حکومت کا ترقیاتی منصوبوں کے لیے 10.2 ارب روپے مختص

ان کا کہنا تھا کہ الیکٹرک وہیکلز کی حوصلہ افزائی سے ایندھن کی مد میں اربوں ڈالر زر مبادلہ کی بچت کا حصول ممکن ہو گا اور الیکٹرک وہیکلز سے ماحولیاتی تحفظ میں معاونت اور مقامی صنعت کو فروغ ملے گا۔

وزیراعظم نے ہدایت کی کہ الیکٹرک وہیکلز کی عام آدمی تک رسائی کیلئے حکومتی اقدامات کا لائحہ عمل تشکیل دیا جائے، الیکٹرک وہیکلز کی تیاری، مینٹی ننس کے لئے مکمل ایکوسسٹم تشکیل دینے کے لیے اقدامات اٹھائے جائیں۔

وزیراعظم شہباز شریف نے حکم دیا کہ الیکٹرک وہیکلز کی تقسیم اور معاونت کے طریقہ کار کی تھرڈ پارٹی ویلیڈیشن کرائی جائے،معاشی طور پر کمزور طبقے سے تعلق رکھنے والے افراد کو ترجیح دی جائے، الیکٹرک وہیکل کے حصول میں حکومتی معاونت کی سکیم بارے عوامی آگاہی مہم چلائی جائے۔

شہباز شریف نے مجوزہ سکیم میں دی جانے والی الیکٹرک بائیکس، رکشوں اور لوڈرز کے بہترین معیار اور ان کے سیفٹی معیار پر پورا اترنے کو یقینی بنانے کی بھی ہدایت کی۔