تفصیلات کے مطابق، قصابوں کی ایسوسی ایشن نے اعلان کیا ہے کہ اس سال مہنگائی کے تناظر میں نرخوں میں اضافہ کرنا ناگزیر ہو گیا تھا۔ نئے نرخنامے کے مطابق، بڑے جانور جیسے گائے، بیل یا اونٹ کے ذبح کرنے کا معاوضہ 12 ہزار سے 15 ہزار روپے مقرر کیا گیا ہے، جبکہ چھوٹے جانور جیسے بکرے یا دنبے کے لیے 6 ہزار سے 8 ہزار روپے وصول کیے جائیں گے۔

یہ بھی پڑھیں: حکومت کا عوام کو انرجی سیور پنکھے آسان اقساط پر دینے پر غور

یہ نرخ گزشتہ سال کی نسبت کئی گنا زیادہ ہیں، جس پر شہریوں خصوصاً متوسط اور کم آمدنی والے طبقے نے شدید تحفظات کا اظہار کیا ہے۔ عوامی حلقوں کا کہنا ہے کہ پہلے ہی مہنگائی نے زندگی اجیرن کر دی ہے، اور اب قصابوں کے نرخ مزید ایک اضافی بوجھ بن کر سامنے آئے ہیں۔ کئی شہریوں نے خدشہ ظاہر کیا ہے کہ اس سال بہت سے لوگ قربانی کی سنت سے محروم رہ جائیں گے۔

دوسری جانب، قصابوں کا موقف ہے کہ روزمرہ اشیاء کی قیمتوں میں اضافے، ایندھن کی قیمتوں، محنت کشوں کی اجرتوں اور عید کے دنوں میں ڈیمانڈ میں بے پناہ اضافے کے باعث ان نرخوں میں اضافہ کرنا مجبوری بن چکا ہے۔ ان کا کہنا ہے کہ عید کے دن کام کی شدت کئی گنا بڑھ جاتی ہے اور بعض اوقات ایک قصاب کو 10 سے زائد جانور ذبح کرنے پڑتے ہیں۔

اس صورت حال میں شہریوں نے متبادل حل تلاش کرنا شروع کر دیے ہیں۔ بعض لوگ خود قربانی کی تربیت حاصل کر رہے ہیں، جبکہ کئی خاندانوں نے گروپ کی صورت میں مل کر اجتماعی قربانی کا بندوبست کیا ہے، تاکہ ایک تجربہ کار شخص کی مدد سے کم خرچ میں یہ فریضہ انجام دیا جا سکے۔