تفصیلات کے مطابق قومی اسمبلی نے سی ایس ایس امتحان کیلئے عمر کی حد میں 5 سال تک اضافے اور امتحان دینے کی تعداد کو 5 مرتبہ تک بڑھانے کی قرارداد بھاری اکثریت سے منظور کر لی ہے۔

قومی اسمبلی کا اجلاس اسپیکر کی زیر صدارت منعقد ہوا، جس میں مسلم لیگ (ن) کی رکن اسمبلی سیدہ نوشین افتخار نے نوجوانوں کی دیرینہ خواہش پر مبنی قرارداد پیش کی۔

قرارداد میں مطالبہ کیا گیا تھا کہ وفاقی حکومت سی ایس ایس امتحانات میں شرکت کیلئے امیدواروں کی عمر کی حد 30 سال سے بڑھا کر 35 سال کرے اور امتحان دینے کی حد کو 3 سے بڑھا کر 5 مرتبہ مقرر کرے۔

ایوان نے قرارداد کو متفقہ طور پر منظور کرتے ہوئے وفاقی حکومت کو سفارش کی کہ اس فیصلے پر جلد عملدرآمد کیا جائے تاکہ زیادہ سے زیادہ قابل اور اہل نوجوان انتظامی شعبے میں خدمات سرانجام دے سکیں۔

قرارداد پیش کرنے والی رکن اسمبلی سیدہ نوشین افتخار کا کہنا تھا کہ عمر کی حد میں اضافے سے ہزاروں نوجوانوں کو فائدہ ہوگا جو اپنی اعلیٰ تعلیم مکمل کرنے کے بعد بھی عمر کی حد کی وجہ سے امتحان میں شریک نہیں ہو پاتے تھے۔

دوسری جانب نوجوانوں نے اس فیصلے کو خوش آئند قرار دیتے ہوئے کہا کہ اس سے انتظامی شعبے میں میرٹ پر قابل افراد کی تعداد میں اضافہ ہوگا۔ اب حکومت کی جانب سے اس قرارداد کو عملی جامہ پہنانے کے لیے اقدامات متوقع ہیں۔