تفصیلات کے مطابق دھماکہ اس وقت ہوا جب گھر میں موجود افراد معمول کے مطابق اپنی سرگرمیوں میں مصروف تھے۔ ضلعی پولیس افسر (ڈی پی او) باجوڑ وقاص رفیق کے مطابق نامعلوم افراد نے ایم این اے مبارک زیب کے گھر کے گیٹ کے قریب بم نصب کیا تھا جو زور دار آواز کے ساتھ پھٹ گیا۔ دھماکے کی شدت اتنی زیادہ تھی کہ اس کی آواز دور دور تک سنی گئی جبکہ گھر کے مرکزی دروازے کو شدید نقصان پہنچا۔

پولیس اور سیکیورٹی ادارے فوری طور پر موقع پر پہنچ گئے اور علاقے کو گھیرے میں لے کر شواہد اکٹھے کرنے کا عمل شروع کر دیا۔ بم ڈسپوزل اسکواڈ بھی طلب کیا گیا تاکہ مزید کسی ممکنہ خطرے کو ختم کیا جا سکے۔ قانون نافذ کرنے والے اداروں نے قریبی علاقوں میں سرچ آپریشن شروع کر دیا ہے تاکہ شرپسند عناصر کو گرفتار کیا جا سکے۔

یہ بھی پڑھیں:متحدہ عرب امارات میں عید الاضحیٰ کی تعطیلات کا اعلان

ڈی پی او کے مطابق ابتدائی شواہد سے یہ ایک مقامی ساختہ بم معلوم ہوتا ہے جو کسی خاص ہدف کو نشانہ بنانے کے لیے نصب کیا گیا تھا۔ خوش قسمتی سے واقعے کے وقت رکن قومی اسمبلی مبارک زیب گھر پر موجود نہیں تھے، جس کے باعث کسی بڑے جانی نقصان سے بچا جا سکا۔

دھماکے کے بعد علاقے میں خوف کی فضا قائم ہو گئی ہے اور مقامی لوگوں نے حکومت سے مطالبہ کیا ہے کہ عوامی نمائندوں اور عام شہریوں کی سیکیورٹی کے لیے مؤثر اقدامات کیے جائیں تاکہ اس قسم کے واقعات کا سدباب کیا جا سکے۔ پولیس نے نامعلوم افراد کے خلاف مقدمہ درج کر کے تحقیقات کا آغاز کر دیا۔