وفاقی دارالحکومت اسلام آباد کے تمام بڑے سرکاری اسپتالوں میں ایمرجنسی نافذ کر دی گئی ہے، جبکہ طبی عملے کی تمام چھٹیاں منسوخ کر دی گئی ہیں۔
وفاقی وزیر صحت کے مطابق پمز، پولی کلینک اور دیگر اسپتالوں کو ہائی الرٹ کر دیا گیا ہے اور تمام عملے کو فوری طور پر رپورٹ کرنے کی ہدایت کی گئی ہے۔ شہر سے باہر موجود طبی عملے کو بھی واپس بلا لیا گیا ہے تاکہ کسی بھی ہنگامی صورتحال سے مؤثر طریقے سے نمٹا جا سکے۔
پنجاب بھر میں بھی تمام ضلعی و صوبائی اسپتالوں میں ایمرجنسی نافذ کر دی گئی ہے۔ ڈاکٹرز، نرسز اور پیرا میڈیکل اسٹاف کو ہدایت کی گئی ہے کہ وہ اسپتالوں میں موجود رہیں اور تمام ضروری انتظامات مکمل رکھیں۔
بھارت کو اس جارحیت کا منہ توڑ جواب ملے گا، بلاول بھٹو
دوسری جانب ڈی جی آئی ایس پی آر نے پریس بریفنگ میں بتایا کہ بھارت نے پاکستان پر 24 مختلف حملے کیے جن میں 6 مقامات کو نشانہ بنایا گیا۔ ان حملوں میں 8 پاکستانی شہری شہید جبکہ 35 زخمی ہوئے، 2 افراد تاحال لاپتہ ہیں۔
پاکستان نے اس بزدلانہ کارروائی کا منہ توڑ جواب دیتے ہوئے بھارت کے 5 جنگی طیارے مار گرائے جبکہ ایک بریگیڈ ہیڈکوارٹر کو بھی نشانہ بنا کر تباہ کر دیا گیا۔
حکومتی ترجمان نے عوام سے اپیل کی ہے کہ وہ افواہوں سے گریز کریں اور صرف سرکاری بیانات پر بھروسہ کریں۔
