ذرائع کے مطابق صوبائی حکومت معاملے کی تحقیقات میں مزید متحرک ہوگئی، کے پی حکومت نے میگا کرپشن سکینڈل کی تحقیقات ایک ہفتے کی بجائے تین دن میں کرنے کا فیصلہ کیا ہے، معاملے کی تحقیقات کیلئے خصوصی کمیٹی نے کام شروع کردیا ۔
کمیٹی ذرائع کا بتانا ہے کہ اپر کوہستان بھیجی گئی ٹیم نے تحقیقات کا آغاز کردیا، تمام تر تحقیقات باقاعدہ ویڈیوز پر کی جائیں گی،تمام ریکارڈ اور شواہد کی ویڈیو ز بنائی جائیں گی،محکمہ بلدیات، آبپاشی اور پبلک ہیلتھ کے حوالے سے بھی چھان بین چند روز شروع کیے جانے کا امکان ہے۔
ذرائع کے مطابق محکمہ خزانہ،سی اینڈ ڈبلیو اور اے جی آفس سے بھی تحقیقات کا آغاز جلد ہوگا۔
واضح رہے کہ سال 2019 سے 2024 کے دوران ضلع کوہستان میں ترقیاتی منصوبوں کی رقم سرکاری بینک سے نجی بینک اکاؤنٹس میں منتقل کیے جانے کے انکشاف ہوا تھا جس پر وزیراعلیٰ خیبرپختونخوا نے تحقیقات کا حکم دیتے ہوئے خصوصی کمیٹی تشکیل دی تھی۔
ذرائع کا بتانا ہے کہ مبینہ کرپشن سکینڈل میں سیاسی شخصیات، اعلیٰ سرکاری افسران اور سی اینڈ ڈبلیو کے اہلکاروں کے ملوث ہونے کا انکشاف ہوا جس پر خصوصی کمیٹی نے مشتبہ اکاؤنٹس کی تحقیقات شروع کردی ہیں۔
دوسری جانب سپیکر خیبرپختونخوا اسمبلی بابر سلیم سواتی نے مبینہ کرپشن سکینڈل سامنے آنے کے بعد پبلک اکاؤنٹس کمیٹی کا اجلاس بلا لیا ہے۔
