مرکز جماعت اسلامی کی جانب سے جاری ایک بیان میں بتایا گیا کہ جماعت اسلامی کے سابق سینٹر پروفیسر خورشید احمد کی عمر 93 برس تھی اور ان کا انتقال برطانیہ کے شہر لیسٹر میں ہوا۔

امیر جماعت اسلامی پاکستان حافظ نعیم الرحمان، سابق امیر جماعت سراج الحق، سیکرٹری جنرل امیر العظیم، نائب امرا اور حافظ ادریس سمیت جماعت اسلامی کے مرکزی رہنماؤں نے پروفیسر خورشید احمد کے انتقال پر گہرے دکھ اور افسوس کا اظہار کیا ہے۔

جماعت اسلامی پاکستان کی قیادت کی جانب سے جاری بیان میں مرحوم پروفیسر خورشید احمد کے لواحقین سے اظہار تعزیت کیا گیا ۔

قیادت کی جانب سے جاری مذمتی بیان میں جماعت اسلامی کے رہنماؤں نے کہا کہ پروفیسر خورشید احمد جماعت اسلامی کے بزرگ اعلیٰ اوصاف کے حامل سیاسی رہنما، عالمی معیشت دان، متعدد کتابوں کے مصنف اور کئی عالمی ادا روں کے سربراہ رہ چکے تھے، پروفیسر خورشید احمد کی ملی قومی خدمات کو ہمیشہ یاد رکھا جائے گا۔

خیال رہے کہ مرحوم پروفیسر خورشید احمد کا شمار جماعت اسلامی کے بانی سید ابو الاعلیٰ مودودی کے دیرینہ ساتھیوں میں ہوتا تھا، پروفیسر خورشید احمد کو اسلام کیلئے خدمات پر 1990 میں کنگ فیصل ایوارڈ سے نوازا گیا تھا، اس کے علاوہ انہیں حکومت پاکستان نے 2011 میں نشان امتیاز بھی دیا تھا، پروفیسرخورشید کو پہلا اسلامی ترقیاتی بینک ایوارڈ بھی عطا کیاگیا۔