پاکستان تحریک انصاف (پی ٹی آئی)  کی سیاسی کمیٹی اجلاس کے اعلامیے میں کہا گیا ہے کہ بانی پاکستان تحریک انصاف (پی ٹی آئی) سے ملاقات کیلئے پانچ رکنی کمیٹی تشکیل دی جائے گی،وہی کمیٹی ہر منگل اور جمعرات کو عمران خان سے ملاقات کیلئے ناموں کی فہرست مرتب کیا کرے گی۔

جاری کردہ اعلامیے کے مطابق ایک ملاقات میں اگلی ملاقات کی فہرست کی منظوری عمران خان سے لی جائے گی، فہرست کے علاوہ کوئی بھی فرد بانی پاکستان تحریک انصاف (پی ٹی آئی) سے ملاقات نہیں کرسکے گا۔ ایسا کرنے والا پارٹی ڈسپلن اور مقرر کردہ قاعدے کا منحرف تصور کیا جائے گا۔ 

بیان میں مزید کہا گیا کہ فہرست میں شامل کسی بھی فرد کو روکنے پر جیل حکام کیخلاف توہینِ عدالت کی پٹیشن دائر کی جائیگی، تاہم کے پی کے حکومتی عہدیداروں کو اس حوالے سے استثنیٰ حاصل ہوگا۔

خیبر پختونخوا حکومت کے عہدیدار کسی بھی دن اور کسی بھی وقت عمران خان سے ملاقات کیلئے آزاد ہوں گے، ان کیلئے پانچ رکنی کمیٹی کی فہرست کی پابندی لازم نہیں ہوگی۔