اسلام آباد ہائیکورٹ میں تحریک انصاف کے رہنماؤں جنید اکبر، رؤف حسن و دیگر کی بانی پی ٹی آئی عمران خان سے ملاقات کیلئے دائر درخواست پر سماعت ہوئی، درخواست گزاروں کی جانب سے نعیم حیدر پنجوتھا عدالت پیش ہوئے۔

عدالت نے جنید اکبر و دیگر کی عمران خان سے ملاقات سے متعلق درخواست پر فیصلہ محفوظ کرلیا۔

بعدازاں میڈیا سے گفتگو کرتے ہوئے وکیل پی ٹی آئی نعیم حیدر پنجوتھا نے کہا کہ اسلام آباد ہائی کورٹ کے باہر میڈیا سے بات کرتے ہوئے کہا کہ عدالت عالیہ میں پی ٹی آئی رہنما جنید اکبر، رؤف حسن و دیگر کی درخواست پر سماعت ہوئی ہے، جیل حکام اور سرکاری وکیل عدالت میں پیش ہوئے۔

نعیم حیدر پنجوتھا کا کہنا تھا کہ 6 ماہ ہو گئے ہیں پی ٹی آئی رہنماؤں کی بانی سے صرف ایک ملاقات کرائی گئی ہے، ہم وکلاء کے نام لیے جاتے ہیں کہ یہ لوگ ملے ہیں، آج 6 رہنما بانی پی ٹی آئی سے ملاقات کے لیے اڈیالہ جیل جا رہے ہیں۔

انہوں نے دعویٰ کیا کہ بانی پی ٹی آئی کو ڈاکٹر کی سہولت بھی فراہم نہیں کی جا رہی اور بشریٰ بی بی کی ملاقات بھی 2، 3 مرتبہ کینسل کروائی گئی ہے،اس سے متعلق سپرنٹنڈنٹ کو درخواستیں لکھی ہیں، جیل حکام نے آج وہی پرانی باتیں دہرائی ہیں۔