جوڈیشل مجسٹریٹ احمد شہزاد گوندل نے 26 نومبر احتجاج پر پی ٹی آئی کے 9 ورکرز کی ضمانت بعد از گرفتاری کی درخواست پر محفوظ فیصلہ سنایا۔ عدالت نے 20 ہزار روپے کے مچلکوں کے عوض پی ٹی آئی کے 9 ورکرز کی ضمانت بعد از گرفتاری کی درخواست منظور کرلی۔ پی ٹی آئی ورکرز تھانہ رمنا کے مقدمہ میں نامزد ہیں۔
دوسری جانب پاکستان تحریک انصاف (پی ٹی آئی) نے 22 مارچ کو مینار پاکستان جلسے کی اجازت کے لیے لاہور ہائیکورٹ سے رجوع کرلیا۔
پاکستان تحریک انصاف (پی ٹی آئی) کے رہنما اکمل خان باری نے درخواست لاہور ہائیکورٹ میں دائر کی، جس میں چیف سیکرٹری پنجاب، ڈپٹی کمشنر لاہور سمیت دیگر کو فریق بنایا گیا ہے۔
درخواست میں مؤقف اختیار کیا گیا کہ پاکستان تحریک انصاف 22 مارچ کو لاہور مینار پاکستان پر شام 8 بجے سے رات 12 بجے تک جلسہ کرنا چاہتی ہے، ضلعی انتظامیہ کو جلسے کے حوالے سے درخواست دی مگر انتظامیہ جلسے کی درخواست پر فیصلہ نہیں کر رہی، جلسہ اور ریلی کرنے کی اجازت پاکستان کا آئین بھی دیتا ہے، پی ٹی آئی کو سیاسی انتقام کا نشانہ بنایا جا رہا ہے۔
درخواست میں استدعا کی گئی ہے کہ عدالت ڈپٹی کمشنر لاہور سمیت دیگر کو درخواست پر فیصلہ کرنے کا حکم دے، عدالت 22 مارچ کو جلسہ کرنے کی اجازت دے۔
