حج کے خواہشمند افراد کیلئے خوشخبری

حج کے خواہشمند افراد کیلئے خوشخبری

January, 9 2025

اسلام آباد:(سنو نیوز) سرکاری حج اسکیم کے تحت مزید 5 ہزار افراد کو فریضہ حج ادا کرنے کا موقع فراہم کیا جا رہا ہے۔ وزارت مذہبی امور کے مطابق، اس اضافی کوٹے کے لیے درخواستوں کی وصولی آئندہ ہفتے شروع ہوگی۔

ذرائع کے مطابق، اس مرتبہ درخواستوں پر قرعہ اندازی کے بجائے "پہلے آئیے، پہلے پائیے" کی بنیاد پر حج ٹکٹ کنفرم کیا جائے گا۔ اس طریقہ کار کا مقصد زیادہ شفافیت اور تیز تر عمل یقینی بنانا ہے۔ وزارت کی جانب سے حج درخواستوں کی وصولی کے لیے 5 دن مختص کیے جانے کی تجویز بھی زیر غور ہے۔

پہلے مرحلے میں سرکاری حج اسکیم کے تحت 81 ہزار 500 درخواستیں موصول ہو چکی ہیں، تاہم اب باقی ماندہ کوٹے کو پر کرنے کے لیے نئی درخواستیں طلب کی جا رہی ہیں۔ ذرائع کا کہنا ہے کہ حج کی سعادت حاصل کرنے کے خواہشمند افراد کو جلد از جلد اپنی درخواستیں جمع کرانے کی ہدایت کی جائے گی۔

وزارت مذہبی امور نے یقین دہانی کرائی ہے کہ اس مرحلے میں بھی تمام عمل شفاف رکھا جائے گا اور درخواست دہندگان کو بروقت معلومات فراہم کی جائیں گی۔ یہ اقدام سرکاری اسکیم کے تحت زیادہ سے زیادہ افراد کو حج کا موقع فراہم کرنے کی پالیسی کا حصہ ہے۔