فیصل چودھری اور فیصل ملک ایڈووکیٹ عدالتی حکم نامہ لے کر اڈیالہ جیل روانہ ہو گئے۔

 

 

انسداد دہشتگردی عدالت میں بانی پی ٹی آئی سے ملاقات کے لیے دائر درخواست پر پی ٹی آئی کے وکلاء اور سرکاری پراسیکوشن کے درمیان دلائل دیے گئے۔ سماعت کے بعد عدالت نے حکم جاری کیا کہ مقدمے کے تفتیشی افسر یا تھانہ نیو ٹاؤن کے ڈیوٹی افسر کی موجودگی میں ملاقات کا انتظام کیا جائے۔

 

 

سماعت کے دوران تھانہ نیو ٹاؤن پولیس کے تفتیشی افسر عدالت میں پیش نہیں ہوئے۔ عدالت نے اس بات پر برہمی کا اظہار کیا اور واضح کیا کہ ملاقات کے عمل کو یقینی بنایا جائے۔

 

 

سماعت کے بعد وکیل فیصل چوہدری نے میڈیا سے بات کرتے ہوئے کہا کہ عدالتی حکم کے باوجود ملاقات میں رکاوٹ ڈالی گئی تو پیر کے دن ہائی کورٹ سے رجوع کریں گے۔ انہوں نے کہا کہ بانی پی ٹی آئی کی موجودہ حالت جاننے کے لیے ملاقات ضروری ہے۔

 

 

فیصل چوہدری نے کہا کہ بانی پی ٹی آئی کے خلاف مقدمات اور ان کی فیملی پر دباؤ ڈالنے کی مہم پنجاب حکومت کی سازش ہے۔ انہوں نے مزید کہا کہ وکلاء کو ملاقات سے روکا جا رہا ہے، لیکن عدالتی حکم کے بعد امید ہے کہ ملاقات ممکن ہو سکے گی۔

 

 

عدالتی حکم نامہ لے کر وکلاء اڈیالہ جیل پہنچ گئے ہیں۔ اگر آج ملاقات نہ ہوئی تو پیر کے روز ہائی کورٹ سے دوبارہ رجوع کیا جائے گا۔