یہ واقعہ اس وقت پیش آیا جب بچی اسکول سے گھر جاتے ہوئے اپنے کتابوں کے بیگ سمیت کھلے گٹر میں جاگری۔ 

 

مقامی لوگوں نے فوری ردعمل دیتے ہوئے اسے بحفاظت گٹر سے نکال لیا۔ 

 

اس واقعے کی ویڈیو سوشل میڈیا پر وائرل ہوئی جس نے عوامی حلقوں میں تشویش پیدا کی اور گٹروں کے ڈھکنوں کی غیر موجودگی پر بحث کا آغاز کر دیا۔

 

 

سوشل میڈیا پر ویڈیو وائرل ہونے کے بعد، صحافی فیض اللہ خان نے اپنی پوسٹ میں لکھا کہ "یہ بچی بہت خوش قسمت ہے جو زندہ واپس مل گئی، ورنہ کتنے ہی بچے ان گٹروں میں گر کر ہمیشہ کے لیے غائب ہو چکے ہیں۔"

 

 

 

 صارفین نے سندھ حکومت اور مقامی انتظامیہ کو تنقید کا نشانہ بنایا، مطالبہ کیا کہ کب تک کراچی کے بچے ان کھلے گٹروں میں گر کر اپنی جان سے ہاتھ دھوتے رہیں گے۔

 

 

یہ واقعہ پہلا نہیں، بلکہ اس سے پہلے بھی کراچی میں کئی ایسے واقعات رونما ہو چکے ہیں جہاں کھلے گٹروں میں گر کر بچے اور شہری زخمی یا ہلاک ہو چکے ہیں۔ جولائی 2024 میں ملیر کے علاقے غفور بستی میں پانچ بچے کھیلتے ہوئے گٹر میں گر گئے تھے، جس میں سے دو بچوں کی موت واقع ہوئی جبکہ تین کو زخمی حالت میں بچا لیا گیا تھا۔

 

 

سوشل میڈیا پر کچھ صارفین نے سوال اٹھایا کہ مقامی شہری خود کیوں اس مسئلے کا حل نکالنے کی کوشش نہیں کرتے؟ ان کا کہنا تھا کہ اگر حکومت ناکام ہے تو شہریوں کو بھی اپنی ذمہ داری ادا کرتے ہوئے ان مسائل کو خود حل کرنا چاہیے۔

 

 

ماضی میں ایسے واقعات کی بارہا رپورٹنگ کے باوجود، انتظامیہ کی ناکامی اور گٹروں کے ڈھکن نہ لگنے پر سندھ حکومت کو شدید تنقید کا سامنا رہا ہے۔ عوامی مطالبہ ہے کہ حکومت اور متعلقہ ادارے اس مسئلے کو فوری طور پر حل کریں تاکہ آئندہ کسی معصوم کی جان خطرے میں نہ پڑے۔