اب ڈرائیونگ لائسنس حاصل کرنے کے لیے نہ طویل قطاروں میں کھڑے ہونے کی ضرورت ہوگی اور نہ ہی دفاتر کے چکر لگانے پڑیں گے۔ سندھ پولیس نے شہریوں کی سہولت کے لیے ڈرائیونگ لائسنس کے لیے ایک آن لائن نظام کا آغاز کر دیا ہے۔

 

 

نئے نظام کے تحت سندھ کے رہائشی اپنے گھر بیٹھے ہی لرننگ اور انٹرنیشنل ڈرائیونگ لائسنس کے لیے درخواست دے سکتے ہیں۔ اس سہولت سے خاص طور پر وہ افراد بھی فائدہ اٹھا سکیں گے جو پہلے سے سندھ کا ڈرائیونگ لائسنس رکھتے ہیں اور انٹرنیشنل لائسنس بنوانا چاہتے ہیں۔ شہری اب اپنے موبائل یا کمپیوٹر کے ذریعے ٹریفک پولیس سندھ کی خصوصی ایپلی کیشن استعمال کرتے ہوئے بآسانی درخواست جمع کروا سکتے ہیں۔

 

 

نئے نظام کے بارے میں بات کرتے ہوئے ڈی آئی جی ٹریفک سندھ، اقبال دارا نے بتایا کہ اس منصوبے کے پہلے مرحلے میں لرننگ اور انٹرنیشنل ڈرائیونگ لائسنس کے لیے آن لائن درخواستوں کو پروسیس کیا جائے گا۔

 

 انہوں نے وضاحت کی کہ لرننگ لائسنس حاصل کرنے کے بعد، درخواست گزاروں کو بیالیس دن کے اندر مستقل لائسنس جاری کیا جائے گا۔ اس سروس سے شہری نہ صرف وقت کی بچت کریں گے بلکہ دفاتر کے چکر لگانے کی زحمت سے بھی بچ جائیں گے۔

 

 

اس موقع پر سندھ کے وزیر داخلہ ضیاء الحسن لنجار نے کہا کہ یہ آن لائن نظام عوامی سہولت کے لیے ایک اہم قدم ہے۔ انہوں نے کہا کہ اس سروس کے ذریعے شہریوں کو لرننگ اور انٹرنیشنل ڈرائیونگ لائسنس کے لیے درخواست دینے کی سہولت ملے گی۔ تاہم، بین الاقوامی لائسنس صرف ان افراد کو جاری کیا جائے گا جن کے پاس سندھ کا درست ڈرائیونگ لائسنس موجود ہوگا۔

 

 

اس آن لائن سسٹم کا مقصد شہریوں کو آسان اور تیز تر خدمات فراہم کرنا ہے تاکہ وہ اپنے گھروں سے ہی ڈرائیونگ لائسنس کے عمل کو مکمل کر سکیں۔ اس نظام کے ذریعے شہریوں کو دفاتر کے دھکوں سے بچانے کے ساتھ ساتھ، درخواستوں کی پراسیسنگ کا عمل بھی زیادہ شفاف اور منظم ہوگا۔