محسن نقوی کی فضل الرحمان سے ملاقات، بلامقابلہ امیر بننے پر مبارکباد
October, 1 2024
اسلام آباد: (سنو نیوز) وفاقی وزیر داخلہ محسن نقوی نے جمعیت علماء اسلام ف (جے یو آئی) کا بلا مقابلہ امیر منتخب ہونے پر مولانا فضل الرحمان اور بلامقابلہ سیکرٹری جنرل منتخب ہونے پر مولانا عبدالغفور حیدری کو مبارک باد دی اور گلدستے پیش کئے۔
تفصیلات کے مطابق وفاقی وزیر داخلہ محسن نقوی جمعیت علمائے اسلام کے سربراہ مولانا فضل الرحمان کی رہائش گاہ پہنچے جہاں انہوں نے مولانا فضل الرحمان سے ملاقات کی اور ان کے لئے نیک خواہشات کا اظہار کیا۔
اس موقع پر وزیر داخلہ محسن نقوی کا کہنا تھا کہ پارلیمان کی بالادستی اور جمہوری اقدار کے فروغ کیلئے مولانا فضل الرحمان کا کردار قابل تحسین ہے، مولانا فضل الرحمان زیرک، مدبر اور دور اندیش سیاسی رہنما ہیں، مولانا فضل الرحمان کی قیادت میں جے یو آئی نے اصولوں پر مبنی سیاست کی ہے۔
محسن نقوی نے کہا کہ مولانا فضل الرحمان کی اپنی جماعت اور پاکستان کے لئے گراں قدر خدمات ہیں، مولانا فضل الرحمان سینئر ترین سیاستدان ہیں اور پاکستان کی سیاست میں ان کا بلند مقام ہے۔
