انٹرا پارٹی انتخابات سے متعلق پی ٹی آئی کی درخواستیں مسترد
September, 4 2024
اسلام آباد: (سنو نیوز) الیکشن کمیشن نے انٹرا پارٹی انتخابات سے متعلق پاکستان تحریک انصاف (پی ٹی آئی) کی چار متفرق درخواستیں مسترد کر دیں۔ تحریک انصاف کے الیکشن کمیشن کے دائرہ اختیار کو چیلنج کرنے کی درخواست بھی مسترد کردی گئی۔
ذرائع کے مطابق فیصلے میں کہا گیا ہے کہ الیکشن ایکٹ اور رولز کے تحت الیکشن کمیشن سیاسی جماعتوں کے انٹرا پارٹی الیکشنز کی چھان بین کر سکتا ہے، سپریم کورٹ نے اپنے فیصلے میں الیکشن کمیشن کے دائرہ اختیار کو تسلیم کر رکھا ہے، الیکشن کمیشن نے مخصوص نشستوں کے تفصیلی فیصلے تک کیس التوا کرنے کی درخواست بھی مسترد کر دی۔
پاکستان تحریک انصاف (پی ٹی آئی) کے حالیہ انٹرا پارٹی انتخابات کا سپریم کورٹ کے تفصیلی فیصلے سے کوئی تعلق نہیں، تحریک انصاف کے انٹرا پارٹی انتخابات پر اعتراض دور کئے بغیر سرٹیفکیٹ جاری نہیں کیا جا سکتا، الیکشن کمیشن نے چاروں درخواستوں پر فیصلہ محفوظ کرتے ہوئے سماعت 18 ستمبر تک ملتوی کی تھی۔
