![Image](/enews/2024/June/06-11-24/news_big_images/pakistan_49459480.jpg)
ترجمان پاکستان ایئر لائن (پی آئی اے) نے کہا ہے کہ پی آئی اے نے قبل از حج آپریشن کے لیے 171 پروازوں چلائیں، پروازوں کے ذریعے 35 ہزار 30 عازمین حج حجاز مقدس روانہ ہوئے۔
ترجمان کے مطابق پی آئی اے کے ذریعے 19 ہزار 500 سرکاری اور 14 ہزار 900 پرائیوٹ اسکیم کے عازمین حج، 630 خدام الحجاج مدینہ منورہ اور جدہ روانہ ہوئے۔
پی آئی اے کے قبل از حج آپریشن کا آغاز 9 مئی سے شروع ہوا تھا جو 11 جون تک جاری رہا۔ قبل از حج پروازیں کراچی، اسلام آباد، لاہور، ملتان، سیالکوٹ اور پشاور سے براہ راست روانہ ہوئیں۔
ترجمان پی آئی اے کے مطابق سکھر اور کوئٹہ سے عازمین حج نے براستہ کراچی، جدہ کا سفر کیا۔ 171 پروازوں میں سے 126 پروازیں وقت سے کچھ دیر پہلے ہی روانہ ہوئیں، قبل از حج آپریشن میں 45 پروازیں موسم کی خرابی اور آپریشنل وجوہات کی بنا پر تاخیر کا شکار ہوئیں۔
قبل از حج آپریشن کامیابی سے مکمل کرنے پر چیف ایگزیکٹو آفیسر پی آئی اے نے متعلقہ ٹیموں کو شاباش دی۔ پی آئی اے کے بعد از حج آپریشن کا آغاز 20 جون سے ہوگا جو 21 جولائی تک جاری رہے گا۔