ہیپاٹائٹس سی ٹیسٹ نہ کروانے پر تنخواہ روک لینے کا اعلان
وفاقی وزیر صحت مصطفیٰ کمال نے پریس کانفرنس میں بتایا کہ وزرا سمیت تمام ملازمین کے لیے ہیپاٹائٹس سی ٹیسٹ لازمی قرار دیا جائے گا، ملک میں ایک کروڑ سے زائد افراد ہیپاٹائٹس سی کا شکار ہیں، پی ایم ہیپاٹائٹس پروگرام کے تحت مریض کو 68 ہزار روپے کی دوا مفت ملے گی۔
وفاقی وزیر صحت کے مطابق بیرون ملک جانے والوں کے لیے ہیپاٹائٹس سی اسکریننگ لازمی قرار دی جائے گی، ڈی پورٹ ہو کر آنے والوں کی اسکریننگ بھی لازمی قرار دی گئی ہے۔
انھوں نے بتایا کہ ہر شہری کو اسکریننگ کروانی ہوگی، اسکریننگ کے لیے ادارہ شماریات نے گیجٹ فراہم کر دیے ہیں، اور اسکریننگ کا ریکارڈ نادرا کے ساتھ منسلک کیا گیا ہے، شناختی کارڈ بنوانے کے لیے ہیپاٹائٹس سی ٹیسٹ لازمی قرار دیا جائے گا۔
یہ بھی پڑھیں: ماحول دوست اقدامات صحت مند زندگی کو دوام بخشتے ہیں: ماہر ماحولیات طارق علی نظامانی
مصطفیٰ کمال کے مطابق اسلام آباد میں ہیپاٹائٹس سی کی مفت اسکریننگ کے لیے 17 پوائنٹس قائم ہیں، نجی اسپتالوں کو بھی اسکریننگ کے لیے کٹس فراہم کی جائیں گی اور ملک بھر میں اسکریننگ کی جائے گی، سرکاری ملازمین کی اسکریننگ کے لیے تمام وزارتوں کو مراسلہ لکھ رہے ہیں۔
