ٹک ٹاکر انصر جٹ المعروف مسٹر پتلو گرفتار
پولیس کے مطابق مسٹر پتلو کے خلاف مہندی کی تقریب میں فائرنگ سے جاں بحق ہونے والے نوجوان ریحان کے قتل کیس کے مدعی اور ان کے اہلخانہ کو مبینہ طور پر سنگین نتائج کی دھمکیاں دینے کے الزام میں مقدمہ درج کیا گیا تھا۔
ایف آئی آر کے مطابق مقتول ریحان کے بہنوئی کی مدعیت میں درج مقدمے میں دو ملزمان انصر جٹ المعروف مسٹر پتلو اور ان کے بھائی کاشف بشیر کو نامزد کیا گیا ہے۔
یہ بھی پڑھیں:مسٹر پٹلو کی 10 نومبر تک حفاظتی ضمانت منظور
درخواست گزار نے الزام عائد کیا کہ ملزمان کی جانب سے قتل کیس کی پیروی سے روکنے کے لیے ان پر اور ان کے اہلخانہ پر دباؤ ڈالا گیا اور سنگین نتائج کی دھمکیاں دی گئیں۔
واضح رہے کہ مسٹر پتلو پہلے ہی نوجوان ریحان کے قتل کے مقدمے میں نامزد ہیں اور مختلف قانونی دفعات کے تحت درج مقدمے میں عبوری ضمانت پر ہیں۔
پولیس نے مدعی کی تحریری درخواست پر مقدمہ درج کرکے واقعے کی مزید تحقیقات شروع کر دی ہیں۔
یاد رہے ڈسکہ روڈ پر واقع فراز کرکٹ گراؤنڈ میں مسٹر پتلو کی شادی کی تقریبات اور انعامی قرعہ اندازی کے اعلان کے باعث لوگوں کی بڑی تعداد جمع ہوئی تھی۔
مسٹر پٹلو کی ٹیم کی جانب سے ایک گاڑی، 50 موٹر سائیکلوں اور دیگر تحائف کی تقسیم کا اعلان کیا گیا تھا۔ واقعے میں جاں بحق ہونے والوں کی شناخت عقیل اور ریحان کے نام سے ہوئی، جن میں سے ریحان کو علاج کے لیے لاہور منتقل کیا گیا تھا، جہاں وہ دم توڑ گیا۔
سوشل میڈیا پر تشہیری مہم کے باعث گراؤنڈ میں لوگوں کا غیر معمولی رش جمع ہوگیا تھا۔ لاؤڈ اسپیکر پر تمام شرکا کو بیک وقت گراؤنڈ میں داخل ہونے کے اعلان کے بعد بھگدڑ مچ گئی۔
پولیس کے مطابق منتظمین نے اجازت نامے کی شرائط اور حفاظتی انتظامات کی خلاف ورزی کی۔ واقعے کے باعث ڈسکہ سیالکوٹ روڈ پر ٹریفک بھی متاثر ہوئی جبکہ املاک کو نقصان پہنچنے کی اطلاعات بھی سامنے آئیں۔ پولیس نے قرعہ اندازی کے لیے رکھی گئی گاڑی اور 50 موٹر سائیکلیں بھی قبضے میں لے لی تھیں۔
واقعے کا مقدمہ تھانہ موترہ میں 9 نامزد ملزمان اور تقریباً 40 سے 45 نامعلوم سکیورٹی گارڈز کے خلاف درج کیا گیا۔ نامزد ملزمان میں مبینہ طور پر مسٹر پٹلو، ان کے بھائی کاشف بشیر، گراؤنڈ کے مالک شاہد جاوید، دانیال منیر، منیر احمد، محسن علی، ارشاد علی، عبداللہ مہدی اور زوہیب منشا شامل ہیں۔
مقدمہ تھانہ کے ایس ایچ او کی مدعیت میں درج کیا گیا، جس میں تعزیرات پاکستان کی دفعات 322، 188، 148، 149، 431، 440 اور 109 سمیت مینٹیننس آف پبلک آرڈر آرڈیننس کی دفعہ 16 شامل کی گئی ہیں۔
دوسری جانب مسٹر پٹلو نے ویڈیو بیان میں واقعے کی ذمہ داری قبول کرنے سے انکار کرتے ہوئے دعویٰ کیا تھا کہ جس وقت گراؤنڈ میں بھگدڑ مچی، وہ وہاں موجود نہیں تھے۔
